Ambasadorët e BE-së dhe SHBA-ve nuk kanë qenë të pranishëm në aktivitetin e organizuar nga Ministria e Integrimit në sheshin “Nënë Tereza” në kuadër të Ditës së Europës.
Ndonëse në axhendë ishte e parashikuar prania e ambasadorëve Romana Vlahutin dhe Donald Lu, asnjë prej tyre nuk ka qenë. Mungesën e zonjës Vlahutin, kryeministri Edi Rama e ka justifikuar me praninë e saj në komisionin e reformës në Drejtësi, duke thënë se është e justifikuar.
“Përshëndetje e veçantë për ambasadoren e BE-së, në mungesë, mungesë plotësisht e justifikuar, për faktin se ambasadorja me siguri është duke ndjekur rrugëtimin e draftit të reformës në drejtësi që sot diskutohet në komision”, tha Rama.
Ndërsa ambasadori amerikan, Donald Lu merrte pjesë në një aktivitet për të drejtat e njeriut me Avokatin e Popullit, Igli Totozani.
