Makina e policisë në Bularat të Gjirokastrës u qëllua me kallashnikov nga një pjesëtar i ushtrisë greke, banor i Bashkisë Dropull.
Konstandin Kacifas, 32-vjeç, hapi zjarr mbi policinë mëngjesin e sotëm, por fatmirësisht nuk pati të lënduar. Nga fotot e publikuara nga historiani Arben Llalla duket qartë se Kacifas i përket ushtrisë greke, madje forcave speciale greke.
“Njeriu i trupave speciale të ushtrisë greke qëlloj mbi policinë e Gjinokastrës. Fotot ekskluzive nga grupi i ushtarëve grekë që mbështetën Kacifas që të largohet në drejtim të Greqisë”, shkruan Llalla.
Për kapjen e Kacifas, kanë mbërritur në Gjirokastër edhe Forcat RENEA.
Njoftimi i policisë:
Bularat, Gjirokastër.
Rreth orës 10:00 në krye të fshatit Bularat, shtetasi Kostandinos Kaçifa, rreth 35 vjeç ka qëlluar me armë zjarri në ajër.
Menjëherë në drejtim të vendit nga vinin të shtënat kanë shkuar shërbimet e Policisë të cilat ishin të dislokuara në qendër të fshatit pasi do zhvillohej aktivitet me rastin e festës së Greqisë.
Shtetasi Kostandinos Kaçifa porsa ka parë shërbimet e policisë që po afroheshin në drejtim të tij ka hapur zjarr me breshëri ndaj punonjësve të policisë duke rrezikuar jetën e tye.
Fatmirësisht nga të shtënat nuk ka punonjës policie të plagosur, por vetëm është thyer xhami i mjetit të policisë.
Policia menjëherë ka rrethuar zonën ku përsëri ky shtetas ka hapur zjarr në drejtim të punonjësve të policisë që po e ndiqnin.
Shtetasi Kostandinos Kaçifa është futur në thellësi të fshatit ku forcat “Shqiponja” dhe sherbimet e tjera të Drejtorisë Vendore të Policisë vijojnë krehjen e zonës për të bërë të mundur kapjen e tij.
Në ndihmë të shërbimeve të Policisë së DVP Gjirokastër kanë shkuar forcat speciale Renea.
Shtetasi Kostandinos Kaçifa jeton në Greqi dhe ka rreth një javë që ka ardhur në Bularat.
Vijon ndjekja.
