Sampdoria do të jetë testi i radhës dhe ndoshta decizivi i Genaro Gattusos, që nëse nuk arrin të rikthejë skuadrën te suksesi, mund të përballet me shkarkimin nga detyra si trajner i Milanit.
Humbja me një lojë të shëmtuar në derbi dhe më pas dështimi në të njëjtën mënyrë në Ligën e Europës përballë spanjollëve të Betisit, kanë lëkundur ndjeshëm pozitat e teknikut aktual të kuqezinjve.
Mediat italiane japin si favorit ish futbollistin e Milanit, Roberto Donadoni, por gjatë ditës së sotme kanë qarkulluar dy opsione të reja, në pamje të parë të vështira, por jo të pamundura.
Kështu njëri prej opsioneve është ai i emërimit të francezit Arsene Wenger, i cili është pa punë, pasi mbylli aventurën e tij prej më tepër se dy dekadash te Arsenali në Premier League.
Francezi është një emër me mjaft eksperiencë, por mbetet për t’u parë gatishmëria e drejtuesve të klubit, për të shpenzuar një shifër relativisht të lartë, të pagës së pretenduar nga ish trajneri i Arsenalit.
Opsioni tjetër, që ka lindur së fundi si ide në ambientet e klubit kuqezi, është që drejtimin ta marrë vetë Leonardo, të paktën deri në fund të sezonit, për t’i besuar më pas një tekniku tjetër, duke filluar nga vera e ardhshme.
Leonardo e ka drejtuar Milanin edhe në sezonin 2009-2010, ndërsa aktualisht shërben si Drejtor Sportiv te kuqezinjtë, bashkë me kapitenin legjendar, Paolo Maldini.
