Policia e Vlorës ka arrestuar një të burgosur, Ervis Gjinin, 36 vjeç, me banim në Vlorë. Ai duhej të ishte në qeli, por duke përfituar nga një leje e shkurtër që i ishte dhënë, nuk kishte denjuar të kthehej më në burg prej mëse një viti e madje gjatë asaj kohe, kishte kryer edhe ca vjedhje të tjera.
Arrestimi i tij u bë në lagjen “1 Maji” Vlorë. Gjini, vitin e kaluar kishte qenë duke vuajtur dënimin në burgun e Fierit për veprën penale “Prodhimi dhe shitja e lëndëve narkotike” por kur kishte dalë me leje për në shtëpi, nuk ishte kthyer më. Gjatë kësaj arratie, ishte në kërkim edhe për vjedhje të kryer në bashkëpunim më shumë se një herë, për të cilën Gjykata e Shkallës së Parë Vlorë e ka dënuar me 2 vite e 6 muaj burg.
Dosja iu dërgua Prokurorisë në ngarkim të tij për veprat penale “Largimi i të burgosurit nga vendi i qëndrimit” dhe “Vjedhja” kryer në bashkëpunim më shumë se një herë, parashikuar nga nenet 323 dhe 134/2 të Kodit Penal.