Zbardhet një pjesë e dosjes hetimore të operacionit ‘Vol-vo 4’, ku flitet për Lulzim Berishën, ish-kreun e bandës së Durrësit, i liruar një vit më parë nga burgu me kusht.
Gazeta Panorama shkruan se Lul Berisha nuk rezulton të jetë i përgjuar, por emri i tij lakohet nga disa persona të përgjuar të grupit kriminal të Avdylajve në Shijak.
Ai përmendet në një bisedë për një person që kërkonin ta punësonin dhe kërkohet një numër telefoni i të ashtuquajturit ‘xhuxhi’.
Vetë ai nuk shfaqet në asnjë përgjim, andaj nuk ka patur asnjë urdhër-arrest për Lul Berishën. Sipas dosjes hetimore, emri i Berishës del nga komunikimet e Jasin Kalajt, Denis Laftiut me anëtarë të grupit të Avdylajve.
Kështu, numri +249 i përdorur nga Jasin Kalaj komunikonte me përdoruesin e numrit +765 te Altin Avdylit dhe i kërkon numrin e telefonit të një personi të quajtur ‘xhuxhi’.
Siç shkruhet në dosjen e Prokurorisë, Lul Berisha komunikon me Kalajn. Ai i nis një numër celulari dhe ky komunikon me numrin +407 duke i thënë se kishin arrestuar B për punën e Italisë dhe se do ta mbajnë në arrest për 40 ditë.
Deri tani, Prokuroria nuk ka asnjë provë për përfshirjen e Berishës në ndonjë trafik droge apo aktivitet kriminal. Zbardhur nga gazeta Panorama
