Një servis është djegur gjatë natës në Elbasan. Burimet thanë se është pronë e e 37 vjeçarit Elton (Kastriot) Kila, i cili u arrestua nga Policia e Elbasanit si pjesë e një organizate të rrezikshme kriminale të specializuar në trafikimin e lëndëve narkotike.
Ngjarja ndodhi gjatë natës në lagjen “Skënderbej”. Flakët e zjarrit kanë përfshirë servisin që sherbente dhe si pikë-shitje e automjeteve. Nuk pati dëme në njerëz, por dëmet materiale janë të konsiderueshme pasi janë djegur disa automjete.
Në vendngjarje shkuan shërbimet e policisë dhe zjarrëfikëset të cilat kanë bërë të mundur lokalizimin dhe fikjen e flakëve. Ende nuk dihen shkaqet por pista kryesore e hetimit është zjarrvënia e qëllimshme. Pronari i servisit u kap më 18 tetor nga policia e Elbasanit dhe u ekstradua për në Itali pasi Prokuroria e Pescarës kishte lëshuar urdhrin e ndalimit ndërkombëtar, për kryerjen e veprave penale “Organizata kriminale”, “Trafikim i narkotikëve”, “Mashtrim” dhe “Kallzim i rremë”.
