Nga Boldnews.al
Gjykata e Apelit konfirmoi dështimin e prokurorisë së Shkodrës, e cila arrestoi në mënyrë të paligjshme pak javë më parë disa mjek dhe punonjës të spitalit të qytetit verior. Paraditen e së Martës, Gjykata e Apelit nuk pranoi apelin e prokurorisë, e cila, pasi u rrëzua në gjykatën e shkallës së parë, kërkonte arrestimin e kardio-kirurgut Luan Dragusha, si edhe ish-drejtorët Përparim Çela dhe Dhurata Uruçi.
Prokuroria e Shkodrës ka kryer një hetim mbi atë që ajo e konsideron si abuzim me porositjen e stendave, të cilat janë të nevojshme për pacientët që vuajnë nga sëmundjet e zemrës. Në bazë të hetimit të saj, Prokuroria e Shkodrës pretendoi në gjykatë se ish-drejtuesit e spitalit, disa mjekë dhe infermierë kanë abuzuar me fondet publike, duke porositur sasi më të mëdha stendash se sa ishin nevojat.
Përtej dyshimeve të Prokurorisë së Shkodrës, gjykatat e të dy niveleve rrëzuan pretendimet e hetuesve, duke vendosur që të gjithë personat në listën e prokurorëve të vijojnë jetën të lirë.
Kërkesat e Prokurorisë për arrestimin e mjekëve dhe ish-drejtuesve të spitalit shkaktuan një reagim të ashpër të kolegëve të tyre në Shkodër, por edhe të opinionit publik. Shumë mesazhe të qytetarëve në media dhe rrjete sociale ishin kritik ndaj veprimeve të nxituara të Prokurorisë, sidomos për arrestimin e mjekut kardio-kirurg, Luan Dragusha, i cili është kthyer nga Shtetet e Bashkuara të Amerikës për t’u shërbyer qytetarëve shkodranë.
Po ashtu, disa gazetarë që mbulojnë kronikën dhe ngjarjet që lidhen me policinë dhe prokurorinë kanë hedhur dyshime se arrestimet e mjekëve në Shkodër, kanë qenë si pasojë e konkurrencës dhe dëshirës së një spitali privat që kërkon të hyjë në tregun e Shkodrës, duke përdorur prokurorinë dhe policinë lokale për të dhunuar e ulur reputacionin e mjekëve. Madje duke iu bërë presion të ikin nga Shqipëria.
Gazetari Senad Nikshiqi, në një status në rrjete sociale, u shpreh se: “Thuaji Spitalit Amerikan që të mos investohet më, se doktor Luani mund të largohet. Ska nevojë ta arrestoni kot”.
Në të njëjtën vijë u shpreh edhe gazetari Simon Shkreli, i cili, gjithashtu në një status në rrjete sociale ditën që gjykata e shkallës së parë vendosi lirimin e mjekëve, u shpreh: “Të arrestosh Doktor Luan Dragushën asht krim. E krimi më i madh i bëhet pacientëve të Shkodrës. Doktori, me 3 vite punë, ka kryer 510 koronare, që do të thotë rreth 3 milion euro “dëm” spitaleve private, dhe po kaq në favor të pacientëve. Por nuk dua të paragjykoj prokuroren e çështjes, por dua të vlerësoj Gjykatësin me integritet, Hasan Selimi, i cili, pasi shqyrtoi faktet, dha vendimin, lirimin e menjëhershëm. Ka mjek me integritet dhe profesionist, ka edhe gjykatës me integritet që nuk e vrasin mendjen për vettingun politik, siç e bëjnë prokurorët!”.