Kryeministrit Edi Rama mbrëmë në një emision televiziv iu dha rasti që të shprehej dhe për kompaninë e lojrave të fatit dhe të basteve sportive online.
Ramës iu dha rasti që të përgjigjej dhe për akuzën që i bëhet, se koncesionin për eksluzivitetin dhe monopolin e basteve sportive e kazinove online për 30 vite me radhë e ka marrë kompania prapa të cilës është vëllai i tij Olsi Rama.
Por kryeministri ynë, si gjithnjë kur ndodhet ngushtë dhe nuk di si të përgjigjet, e kaloi tërë këtë pyetje që ngrenë shqiptarët çdo ditë, por që e ngriti dhe gazetari në emision, me një batutë.
Rama bëri ironi me faktin se tashmë qënka përmendur vëllai i tij si pronar i vërtetë i “Bastarena”, pasi në të gjitha rastet e tjera, sa herë ndodh diçka në Shqipëri, përmendet emri i Taulant Ballës si i përzier.
Pra me gjithë faktet e sjella nga media, Edi Rama i ka devijuar me një batutë përgjigjes në lidhje me pronësinë e kompanisë monopol të kazinove e basteve sportive online të vëllait të tij Olsi Rama.
Megjithatë mbrëmë u vu re se kryeministri Edi Rama ishte shumë i acaruar dhe thuajse gjatë gjithë emisionit televiziv ishte në sherr me gazetarët e panelit.
Duket sikur diçka fsheh, diçka e “bren” kryeministrin, pasi ka kohë që ka humbur qetësinë dhe nuk është më ai që ka qënë, ka lëshuar gjuhën, përdor pa kriter etiketimet dhe fyerjet.
Dhe për t’i ardhur në ndihmë kryeministrit Edi Rama në lidhje me sikletin që e ka zënë me kompaninë “Bastarena”, po evidentojnë fakte të reja që tregojnë se kjo kompani monopol i lojrave të fatit dhe basteve online ka mbështetje qeveritare.
Shqipëria, duke qënë një vend që, pavarësisht se ka 28 vite që ka dalë nga diktatura, shteti për qytetarët shqiptarë është punësim, garanci dhe e ardhme.
Dhe duke qënë se gjithçka është e lidhur me shqiptarët-konsumatorë, kështu shihet dhe nga biznesi shqiptar.
Për të krijuar bindjen se gjithçka është e garantuar, është ligjore dhe jo mashtrim, dhe kompania monopol “Bastarena” në reklamimet e saj për të joshur klientët shqiptarë mosbesues shkruan se është kompani me “garanci shtetërore” dhe ka “garancinë e qeverisë shqiptarë”.
Por, teksa ka shpërthyer debati për kazinotë dhe bastet elektronike, të cilat pas 1 janarit të vitit të ardhshëm do të zhduken nga qarkullimi, si dhe akuzat se “Bastarena” kompania monopol që do të marrë në dorë të gjithë lojrat e fatit dhe bastet sportive online është e Olsit, pronarët janë trembur dhe kanë “korrektuar” njoftimet reklamuese.
Pronarët prapa të cilëve qëndron vëllai i kryeministrit, janë kujdesur për të hequr togëfjalëshat “garancinë shtetërore” dhe “garancinë e qeverisë shqiptare”.
Një shpejtësi e tillë korrektuese dhe për të zhdukur çdo gjurmë të mbështetjes qeveritare dhe të kryeministrit Edi Rama për kompaninë “Bastarena” krijon hije dyshimi se diçka është luajtur këtu. Njëherësh dhe u jep vërtetësi të gjitha akuzave për pronësinë e Olsi Ramës mbi këtë kompani monopol të lojrave të fatit dhe basteve online.
Për të qënë korrektë me lexuesin tonë serioz dhe gjithnjë e në rritje, po japim dy pasazhe të njoftimeve reklamuese të “Bastarena”, të cilat do të publikohen dhe faximile në “PAMFLETI”.
Në pasazhin e parë të njoftimit publicitar me siglën e “Bastarena” shkruhej: “Shoqëri e besueshme me garanci shtetërore”, dhe pas shpërthimit të akuzave ndryshohet dhe bëhet: “Shoqëri e besueshme, e licensuar rregullisht nga shteti shqiptar”.
Në pasazhin e dytë të njoftimit reklamues shkruhej: “Aktualisht “Bastarena” është shoqëria e parë dhe e vetme e licensuar në treg për lojrat elektronike në distancë. Ne ju shërbejmë me përvojën tonë të konsoliduar, me garancinë e qeverisë shqiptare”.
Ndërsa pas shpërthimit të akuzave korrektohet dhe bëhet: “Aktualisht “Bastarena” është shoqëria e parë dhe e vetme e licensuar në treg për lojrat elektronike në distancë. Ne ju shërbejmë me përvojën tonë të konsoliduar”.
Pra duke fshirë evidentimin e mbështetjes së qeverisë dhe shtetit shqiptar për kompaninë monopol të lojrave të fatit dhe basteve sportive online, është tentuar të fshihet pronari i vërtetë, vëllai i kryeministrit, Olsi Rama.
Por gjithçka lë gjurmë, dhe krimi më i madh, jo më lojrat e fatit dhe bastet sportive në Shqipëri që janë një “sport” i dashur dhe popullor.
Ndaj Edi Rama duhet të tregohet më i qetë, pasi është vetëm fillimi. Do ketë prova dhe fakte të tjera që vertetojnë përfshirjen e vëllait të tij apo klientelës së tij në të gjitha maskarallëqet në Shqipëri, duke përfituar si pa të keq paratë e qytetarëve shqiptarë. /Pamfleti/
