Zbardhen detaje të reja lidhur me vrasjen në lokalin ‘Monopol’ në ish-Bllok mbrëmjen e së enjtes në Tiranë.
Avokati, njëherësh miku i Redi Popeskut, pronarit të lokalit ku u vra Fabion Gaxha dhe u plagosën Ervis Martinaj dhe Eljon Hato shprehet i sigurt se këngëtarja Elvana Gjata nuk ka lidhje me krimin, siç është përfolur deri tani në media.
I ftuar në emisionin “ Debati në Channel One” të Roland Qafokut, Ferdinand Doja thotë se këngëtarja nuk është motivi i krimit.
“Çdo aludim se sherri dhe ngjarja ka ndodhur për shkak të Elvana Gjatës, është një sajesë. Ajo shkoi në lokal për të marrë një çelës të dashurit të saj, biznesmenit të përfshirë në konflikt, Ervin Matës. Të dyja palët kanë shkuar për t’u sqaruar për diçka tjetër, por jo për këngëtaren. Mata dhe Martinaj kanë pasur njohje të mëparshme. Dy personat kanë qenë duke biseduar qetë, e më pas ka ardhur një person tjetër dhe ka ngatërruar gjithçka, ai ishte Fabian Gaxha, i cili mbeti edhe viktimë”, u shpreh Doja.
