Mediat spanjolle raportojnë se trajneri i Real Madridit, Julen Lopetegui, ka kohë deri në ndeshjen kundër Barcelonës më 28 tetor, për ta siguruar vendin e tij si trajner në “Santiago Bernabeu”.
Presidenti i Real Madridit, Florentino Perez, thuhet se i ka dhënë ultimatum Lopeteguit për ta përmirësuar formën e klubit madrilen, pasi që gjatë shtatë ndeshjeve të fundit kanë arritur t’i fitojnë vetëm dy prej tyre.
Nëse ai nuk arrin ta përmirësojë formën e skuadrës para se të udhëtojmë në Camp Nou për ndeshjen kundër Barcelonës, atëherë ai do të shkarkohet nga puna.
Spanjolli u emërua në vendin e trajnerit pasi përfundoi sezoni i kaluar, pas dorëheqjes së Zinedine Zidanit. Në kohën kur u emërua trajner i Real Madridit, Lopetegui e kishte në dorë edhe drejtimin e Kombëtares së Spanjës.
Tashmë posti i tij në krye të skuadrës mbretërore është në dilemë të madhe.
