Sot zhvillohet protesta e radhës për mbrojtjen e Teatrit Kombëtar, mirëpo ndryshe nga herët e tjera do të zhvillohet përpara Pallatit të Kongreseve.
Protestuesit i kërkojnë komisionerit Johannes Hahn, që të vendosë teatrin në axhendën e bisedimeve me qeverinë.
“Neser ne oren 13.30 para pallatit te kongreseve protestojme kunder shurdherise se BE ndaj ligjit per shembjen e teatrit dhe instalimit te diktatures ne Shqiperi! Protesto dhe ti!”, thuhet në njoftimin e Aleancës për mbrojtjen e Teatrit.
Protesta pritet të nisë rreth orës 13:30. Kryeministri Rama dhe mazhoranca socialiste votuan dy javë më parë me 75 vota pro, për prishjen e Teatrit Kombëtar.
Pas një seancë, ku disa prej deputetëve socialistë, u rrekën të shpjegojnë se pse duhet prishur Teatri Kombëtar, erdhi edhe vota pro prishjes së tij dhe hapja e rrugës për ndërtimin e Teatrit të ri Kombëtar nga kompania “Fusha”.
Opozita e ka kundërshtuar votimin e ligjit për prishjen e Teatrit Kombëtar duke e cilësuar atë si anti-kushtetues dhe si ligj që grabit hapur pronën publike që i përket teatrit dhe ia jep atë kompanisë “Fusha”, që në këmbim të ndërtimit të teatrit të ri kombëtar, do përfitojë tokën publike ku do ndërtohen 7 kulla.
Ligji për teatrin, i amenduar sipas Partisë Socialiste, ka mbërritur në Presidencë 9 ditë më parë. Ligji për Teatrin u kthye nga Presidenti Meta pak javë përpara fundit të sesionit parlamentar, duke theksuar një sërë problematikash dhe shkeljesh ligjore, por socialistët nuk e trajtuan këtë çështje.
Me fillimin e sesionit të ri parlamentar, socialistët, fillimisht në komision dhe më pas në Kuvend bënë atë që e emërtuan si amendim të ligjit të presidentit, edhe pse sipas opozitës kjo ishte e paligjshme dhe anti-kushtetuese.
Ligji i ri që i ka vajtur Metës për shtyrtim ka të njëjtin numër me atë që u kthye nga Kreu i Shtetit herën e parë. Tashmë mbetet për t’u parë nëse Meta do e kthejë sërish ligjin në Kuvend.
PD e konsideron këtë një ligj të ri dhe kjo i jep të drejtë Metës që ta kthejë sërish në Kuvend, ndërsa për socialistët ligji është i njëjti dhe për ta kjo është çështje e mbyllur ligjërisht.
Kreu i PD-së Lulzim Basha ka deklaruar se shembja e teatrit kombëtar është një akt barbar dhe se do jetë në krah të artistëve për të mbrojtur atë me çdo mjet dhe instrument.
