Mesa duket çdo gjë është harruar midis Jose Mourinho dhe Claudio Ranieri-t, teksa portugezi ka përgëzuar trajnerin e Leicester City për titullin e fituar. Megjithëse “Dhelprat” e humbën shansin e tyre me barazimin në “Old Trafford” , barazimi i Chelsea-t 2:2 me Tottenham i dha titullin matematikisht kryesuesve. Marrëdhëniet midis dy trajnerëve kanë qenë gjithmonë të ngurta, sidomos gjatë periudhës kur Mou ishte në Seria A dhe tallej me arritjet e pakta të Ranierit.
Tashmë pas fitores së Premier League, “The Special One” ka përgëzuar arritjen e madhe të italianit, i cili fitoi kampionatin duke bërë mrekullinë më të madhe në historinë e futbollit “Unë dua të përgëzojë të gjithë personat e përfshirë, nga lojtarët e Leicester, stafin, pronarin dhe tifozët,” shprehet Mourinho. “Titulli kampion i shkoi Ranieri-t dhe është një gëzim i madh për mua që arrita ta përjetojë këtë moment magjik në karrierën e tij.”
