Nga Boldnews.al
Mund të duket sikur Ramës i ka dalë situata nga kontrolli, ku disa syresh të qeverisë e partisë së tij janë implikuar me ngjarje të rënda, por ai ka gjithçka nën monitorim e madje dirigjon çdo skandal që shfaqet nga shtëpia e tij politike.
Në vitin e parë të mandatit të dytë qeverisës, janë publikuar aq shumë skandale sa çdo e keqe po kthehet në normalitet, e madje rutinë të frikshme, fundi i së cilës mbetet me shumë të panjohura.
U mendua se me kapjen e kushërinjve të ish-ministrit të Brendshëm Saimir Tahiri në Itali dhe me lëshimin e urdhër-arrestit nga Prokuroria e Krimeve të Rënda për Saimir Tahirin të akuzuar për trafik droge, Rama do i kishte ditët e numëruara. Shto këtu edhe një kërcënim të ish-ministrit kur u shpreh: “Nuk ka burrë nënë e bir kurve që të më pengojë për të kërkuar drejtësi”. Shumëkush e mori si shantazh ndaj Ramës, por kryeministri nuk u tërhoq.
I siguroi paprekshmërinë duke shkërmoqur që në gjenezë hetimin me largimin e prokurorëve të çështjes së tij dhe më pas nisi avazi i njohur që në Gjykatën e Apelit të Krimeve të Rënda Tahirit t’i binte përfundimisht masa e sigurisë “arrest shtëpie”. Tahiri është një njeri i lirë që në këto kushte e pret me qetësi vendimin që do japë drejtësia në të ardhmen.
Pa u sfumuar ende çështja “Tahiri”, u duk se Ramës i plasi në duar një “bombë” tjetër brenda kabinetit të tij. Por kryeministri e ktheu në favor faktin që vëllai i ministrit të Brendshëm Fatmir Xhafaj, i dënuar në Itali për trafik droge dhe i dyshuar se këtë aktivitet e vijonte edhe pasi Xhafaj u bë ministër, ta sfumonte çështjen duke u “betuar” se nuk ishte Agron Xhafaj në përgjim dhe se ekspertiza e porositur prej tij e konfirmonte këtë.
Pa mbërritur akoma ekspertiza zyrtare për Agron Xhafajn, kreu i grupit Parlamentar të PS-së Taulant Balla u akuzua se kishte ndihmuar Edmond Begon, ish-anëtarin e Bandës së Lushnjes (të dënuar për trafik droge) që të merrte disa tendera publik, kryesisht nga OSHEE. Vetë Balla e pranoi, madje me mburrje që ishte mik shtëpie i Begos, duke e konsideruar si një situatë krejt normale, pavarësisht se ai ishte i dënuar për trafik ndërkombëtar të lëndëve narkotike.
Pa u mbyllur muaji nga skandali i mëparshëm, një njeri anonim si Rexhep Rraha nga Fushë-Kruja, djali i deputetit socialist, dhunoi, torturoi dhe përdhunoi ish-të dashurën Xhisiela Maloku. Policia dhe prokuroria për shumë javë manipuluan, fshehën rastin dhe e “amnistuan” të birin e deputetit, por pas publikimit të dëshmisë së nënkomisar Emiljano Nuhut dhe akuzave se në zyrën e tij e kishin kërcënuar me armë në praninë e deputetëve Rrahman Rraja, Taulant Ballad he kryebashkiakut të Krujës Artur Bushi gjithçka ndryshoi. Tashmë Rexhep Rraja 24 vjeç është vënë në pranga.
Po Ramën çfarë e gjeti? Asgjë, dhe gjasat janë që të tentojë që edhe këto skandale të mëdha ti marrë si kredite politike. Ka një plan që e ndjek me përpikmëri, ku pasi u shperthen në duar skandali, e mban gjallë me deklarata, reagime, batuta dhe në fund tenton të shfaqet në publik si një kryeministër që nuk ndërhyn në punët e drejtësisë dhe që është me parimin: “të gjithë të barabartë para ligjit”. Ndonëse ligjin e bëjnë të pushteshmit e lidhur me krimin dhe politikën, kryeministri me armatën e propagandistëve po tenton të shfaqet si personi që nuk e di se çfarë bëjnë njerëzit e tij poshtë dhe kur këtë e mëson, ai të ndëshkon apo përjashton nga grupi socialist…
