Në vigjilje të ndeshjes së mesjavës që skuadra e Skënderbeut do të zhvillojë ndaj Laçit, kontigjenti bardhekuq numëron dy mungesa të rëndësishme. Sipas njoftimt të bërë nga vetë zyrtarët e klubit korçar, në ndeshjen ndaj Laçit, ekipi kampion në fuqi do të duhet të bëjë pa shërbimet e Liridon Latifit dhe Kristi Vangjelit. Të dy futbollistët kanë plotësuar numrin e kartonëve të verdhë në ndeshjen e fundit të fituar në shtëpi ndaj Bylisit.
Sebino Plaku mund të mungojë ndaj Laçit dhe ndaj Teutës për shkak dëmtimi. Më shumë se mungesa e Latifit dhe Vangjelit në ndeshjen ndaj Laçit, por të gatshëm për ndeshjen e fundjavës ndaj Teutës, ajo që shqetëson drejtuesit e Skënderbeut është dëmtimi i sulmuesit Sebino Plaku. Ky i fundit po kalon një formë shumë të mirë sportive, por mësohet se ka pësuar një tërheqje muskulore, duke rrezikuar prezencën e tij, jo vetëm në ndeshjen ndaj Laçit, por edhe në fundjavë ndaj durrsakëve.
