Dy shqiptarë janë ndaluar nga karabinierët dhe mund të përballen me masa administrative të rënda pasi kanë therur në oborrin e shtëpisë një dele me rastin e Pashkëve ortodokse. Ngjarja ka ndodhur mbrëmjen e 29 prillit në komunën e Arquà Polesine, në provincën e Rovigos në Veneto.
Mediat lokale e kanë përshkruar si një ngjarje horror dhe japin detaje të therjes së deles. Ato shkruajnë se praktika barbare është ndalur nga ndërhyrja e karabinierëve dhe të punonjësve të shërbimit shëndetësor.
Kanë qenë fqinjët që mbrëmjen e 29 prillit kanë dhënë alarmin për atë që po ndodhte në oborrin e shtëpisë së shqiptarit, pasi kanë dëgjuar blegërimat e çuditshme të deleve.
Pas sinjalizimeve, në vend kanë shkuar karabinierët, por edhe shërbimi shëndetësor. Për një prej kafshëve nuk mund të bëhej më asgjë, duke qenë se ishte therur, varur me kokën poshtë dhe po i nënshtrohej rrjepjes. Delja tjetër ishte lidhur aty pranë dhe shumë shpejt do e priste i njëjti fat, nëse nuk do të kishte qenë për ndërhyrjen e forcave të rendit dhe autoritetit shëndetësor që i dha fund kasapërisë.
Dy shqiptarët janë shoqëruar në stacionin e karabinierëve në rrugën Silvestri, për të shpjeguar sipas këndvështrimit të tyre therjen e kafshëve për Pashkët ortodokse.
Gjithçka sipas personelit të shërbimit veterinar kishte ndodhur jashtë çdo autorizimi dhe në kundërshtim me çdo lloj norme higjieno-sanitare. Pasoja të mundshme edhe për italianin e zonës që iu kishte shitur 2 qengjat.
