Të mërkurën, në orën 18:30, në stadiumin “Selman Stermasi”, do të luhet derbi i 145-të midis Tiranës dhe Partizanit. Ky ballafaqim është i inkuadruar në kuadrin e javës së 33-të të Superiores, teksa kreu mbahet nga Skënderbeu, me 72 pikë.
“Demat e kuq” janë 2 pikë pas korçarëve dhe 21 pikë para rivalëve të përjetshëm bardheblu. Nga ana e saj, Tirana renditet në vendin e pestë, me 49 pikë. Nga ballafaqimi i fazës së tretë me të kuqtë, skuadra e drejtuar nga Ilir Daja ka shtuar 10 pikë në llogarinë e vet, ndërsa Agostineli dhe të tijtë kanë marrë edhe 21 pikë të tjera. Pra, ecuria e dy skuadrave kryeqytetase flet qartë nga ballafaqimi i fundit deri në këtë të radhës, i fundit për këtë kampionat. Të eliminuar nga Kupa e Shqipërisë, që në turin çerekfinal, ndaj objektivat sezonalë i kanë të varur vetëm te kampionati. Megjithatë, në duele të tilla nuk do të thotë shumë klasifikimi momental, sepse karikimi i lojtarëve, stafeve teknike dhe taborreve të tifozëve është maksimal.
Si të thuash, luhet për jetë a vdekje. Nëse të kuqtë janë në rrugën e titullit, për bardheblutë merr shumë kuptim shprehja: “Le të mos e fitoni titullin, mjafton të fitoni derbin me Partizanin”. Le që ka ende shpresa për vendin e tretë, që do të thotë pjesëmarrje në Kupat e Europës. Pra, antagonizmi mbetet në shkallën sipërore. Sa i përket historisë së këtyre përplasjeve, deri tani janë luajtur 144 ndeshje në total. Partizani ka 60 fitore, Tirana 40 të tilla dhe 44 ndeshje kanë përfunduar në barazim. 210 gola ka shënuar Partizani, përkundrejt 160 golave të Tiranës. Sfida e fundit është luajtur më 4 mars 2016 dhe është fituar 2-0 nga Partizani. Golat i kanë shënuar Sukaj 6′ dhe Fejzullahu 12′.
Pra, “peshorja” e ecurisë së viteve të fundit, por edhe e këtij kampionati, anon jo pak nga të kuqtë, që kanë fituar 15 tituj kampioni, ndërsa bardheblutë goxha më tepër, 24 tituj. Barazimi 2-2 është rezultati i fiksuar më shumë në ndeshjet derbi, mes Tiranës dhe Partizanit, plot 28 herë në 43 barazime. Në sfidën e radhës ka jo pak “ish”-ë. Karabeci, El.Bakaj, Ed.Bakaj dhe Muzaka (ky i fundit i dëmtuar) kanë pasur eksperienca të kuqe, madje kanë dalë nga Akademia e Partizanit. Bicaj dhe Kalari kanë një të kaluar bardheblu, kush më pak e kush më shumë. Kujtojmë se derbi i fazës së parë, i luajtur në “Qemal Stafa”, më 3 tetor 2015, është fituar 1-0 nga “demat”. Golin e vetëm e ka shënuar Xhevahir Sukaj, në minutën e 51-të. Interesant është fakti se kryesor asokohe ishte Lorenc Jemini, i cili gjykoi edhe ballafaqimin e fazës së dytë në “Selman Stermasi”, që u mbyll pa gola, më 7 dhjetor 2015.
