Gjatë punimeve të Asamblesë së Përgjithshme të OKB, Presidenti Meta është takuar me homologun e Polonisë, Andrzej Duda. Të dy homologët kanë vlerësuar marrëdhëniet Shqipëri-Poloni, ndërsa theksuan se dy vendet kanë patur bashkëpunim prej dekadash.
“Vlerësoj rritjen e interesit e bashkëpunimit dypalësh në fushën e turizmit. Kënaqësi të konstatoj rritjen gjithnjë në rritje të turistëve polakë në Shqipëri. Vizita e Presidentit të Polonisë në Shqipëri do forcojë më tej marrëdhëniet mes dy vendeve”, tha Meta.
Meta dhe Duda kanë dhënë mbështetje reciproke për kandidaturat e të dy vendeve në Këshillin e Sigurimit të OKB-së. “Pranoj me kënaqësi ftesën e Presidentit Meta për të vizituar Shqipërinë”, tha presidenti i Polonisë.
“Në kuadër të pjesëmarrjes në punimet e Asamblesë së Përgjithshme të Organizatës së Kombeve të Bashkuara, Presidenti i Republikës, Sh.T.Z. Ilir Meta, u takua me Presidentin e Polonisë, z.Andrzej Duda. Të dy bashkëbiseduesit ndanë të njëjtin mendim lidhur me marrëdhëniet shumë miqësore e të bashkëpunimit prej dekadash mes dy vendeve dhe nevojën e forcimit dhe intensifikimit të mëtejshëm të tyre në të ardhmen. Në mënyrë të veçantë të dy Presidentët vlerësuan rritjen e interesit dhe të bashkëpunimit në fushën e turizmit dhe numrin gjithnjë në rritje të turistëve polakë që vizitojnë Shqipërinë. Presidenti Meta, shprehu mirënjohjen për mbështetjen që Polonia i jep procesit të integrimit europian të Shqipërisë dhe çeljes së negociatave të anëtarësimit në BE”, thuhet në njoftimin e presidencës.
I pari i shtetit shqiptar ftoi homologun polak për një vizitë zyrtare në vendin tonë, ndërsa kjo thirrje mori konfirmimin pozitiv të presidentit të Polonisë.
“Gjatë bisedës u vlerësuan dhe mbështetjet reciproke për kandidaturat e të dy vendeve në Këshillin e Sigurimit të OKB dhe organizata të tjera ndërkombëtare. Presidenti polak pranoi me kënaqësi ftesën e Presidentit Meta për një vizitë zyrtare në Shqipëri, e cila do të forconte më tej marrëdhëniet midis dy vendeve”, thuhej mes tjerash.
