Përmbaruesit shpallin një moratorium për bojkot të shërbimeve bankare dhe akuzojnë ministrin e Financave Arben Ahmetaj bashkë me ministren e Drejtësisë Etilda Gjonaj se kanë ndryshuar udhëzimin e tarifave përmbarimore në favor të sektorit bankar.
Ditën e djeshme u zhvilluan zgjedhjet në Dhomën Kombëtare të Përmbaruesve. Asambleja e Përgjithshme e Përmbaruesve Gjyqësorë Privatë, rizgjodhi për një mandat 4 vjecar Kryetarin e Dhomës, Tedi Malaveci me 101 vota pro dhe 2 kundër. Malaveci njihet si kundërshtar i ashpër i sistemit bankar vitet e fundit nëpërmjet qendrimeve dhe drejtimit të Dhomes së Përmbaruesve.
Ndërkaq, bëhet me dije se në të njëjtën mbledhje, përmbaruesit kanë shpallur një moratorium për bojkotim të shërbimit ndaj bankave, pasi i akuzojnë se bashkë me ministrin Ahmetaj dhe ministren e drejtësisë Gjonaj kanë ndryshuar udhëzimin e tarifave përmbarimore në favor të sektorit bankar.
Disa ditë më parë, për këtë arsye, Dhoma Kombëtare e Përmbaruesve i kërkoi Ramës shkarkimin e dy ministrave.
