E kush tjetër përveç Ylli Shametit meritonte të shpallej njeriu i ndeshjes në fitoren 1-0 të Kukësit me Kamzën. Pas ndeshjes ai folli per Supersport.
Si ndihesh kur je “ylli” i mbrëmjes?
E rëndësishme është që fituam dhe kemi vazhdimësi pozitive në rezultate. Goli më kënaq, por kur vjen me 3 pikë, akoma më mirë. Jemi mirë, por duhet të jemi me këmbë në tokë, pasi të gjitha skuadrat janë të vështira për t’u mundur.
Si e sheh rivalitetin me Skënderbeun, jeni vetëm një pikë larg?
Nuk është vetëm Skënderbeu, të gjitha skuadrat janë të forta. Ka shumë rivalitet. Ndeshjen e radhës e kemi me Gjirokastrën. Më pas, edhe Skënderbeun do e vlerësojmë si çdo ekip tjetër.
Pse skuadra nuk shkëlqen shumë në lojën sulmuese?
Që nga ndeshja e parë kemi krijuar shumë raste në sulm, por nuk i kemi shënuar. Në një ekip që formatohet gati totalisht në verë, edhe prurjet duan kohën e vet të mësohen. Në javët në vazhdim, do jemi akoma më mirë në të gjitha repartet. Sot nuk shënuam disa raste, edhe prej portierit kundërshtar.
A flitet për titullin te Kukësi që në këtë moment?
Gjithmonë i kam marrë ndeshjet me radhë. Ua kam thënë edhe çunave këtë. Kjo është mënyra më e mirë për të arritur objektivat. Klubi vendos objektivat e veta, kurse ne duhet të marrim maksimumin nga çdo ndeshje.