25 fitore dhe 1 barazim në 26 ndeshjet e fundit të luajtura në kampionat. Juventus-i i Massimiliano Allegri-t, që siguroi titullin e pestë radhazi në Serie A javën e kaluar, nuk ka ndërmend të ndalet. Viktima e radhës e bardhezinjve ka qenë skuadra e Carpi-t, që është mundur me rezultatin 2-0 në “Juventus Stadium”.
Kjo ka qenë fitorja e 15 radhazi në kampionatin italian për torinezët dhe e 10-a e njëpasnjëshme në shtëpi. Gjithashtu, bardhezinjtë nuk kanë pësuar asnjë gol në fushën e tyre në 10 sfidat e fundit të luajtura në Serie A në shtëpi (rekord për klubin) dhe kanë grumbulluar 55 nga 57 pikët që kanë pasur në dispozicion që nga ndeshja e fazës së parë të luajtur kundër Carpi-t dhjetorin e kaluar, e fituar 3-2 nga kampionët e Italisë.
Ndeshja e sotme është zhbllokuar në minutën e 42-të të pjesës së parë nga një gol i brazilianit Hernanes, i cili ka mposhtur portierin e miqve me një goditje të saktë më të djathtën nga jashtë zone. Ky ka qenë edhe realizimi i parë i ish-fantazistit të Inter me fanellën e Juvenus. Dominimi i vendasve ka qenë absolut gjatë gjithë 90 minutave dhe goli i sigurisë ka ardhur 10 minuta para fundit, teksa autori i golit ka qenë Simone Zaza. Juventus, kur kanë mbetur edhe dy ndeshje nga fundi, është ngjitur në kuotën e 88 pikëve në renditje, ndërsa Carpi mban vendin e katërt nga fundi me 35 pikë.
Juventus-Carpi 2-0
Shënues: Hernanes 42’, Zaza 80′
Juventus: Buffon, Rugani, Bonucci, Evra, Cuadrado (Lichtsteiner 74’), Pogba, Hernanes, Asamoah (Sturaro 85’), Alex Sandro, Mandzukic, Morata (Zaza 46’). Trajner: Allegri.
Carpi: Belec, Zaccardo, S. Romagnoli, Suagher, Sabelli, Crimi (Porcari 74’), Cofie, Martinho (Lasagna 66’), Gagliolo,Verdi (de Guzman 85’), Mbakogu. Trajner: Castori.
Gjyqtar: Irrati
Kartonë të verdhë: Mandzukic, Rugani, Bonucci, Pogba/Martinho, Crimi
