Është mbyllur në barazim 1-1 supersfida e ditës së shtunë mes Skënderbeut dhe Tiranës, e vlefshme për javën e pestë të kampionatit të Kategorisë Superiore. Ishin bardheblutë ata që kaluan të parët në avantazh me anë të Hasanit. Futbollisti i 24 herë kampionëve ka dërguar në portën e korçarëve një top të goditur me kokë pas atij shërbimi fantastik të Dajës nga e djathta. Bardhekuqtë e Skënderbeut nuk janë dorëzuar për asnjë moment, me sulme të intensifikuara në pjesën e dytë duke dominuar thuajse plotësisht skuadrën e Tiranës në gjysmëfushën e saj. Tentativa të shpërblyera në fund, me bardheblutë që janë dorëzuar në të 87’, kur John ka barazuar shifrat në 1-1.
Pas javës së pestë, Skënderbeu rikthehet të kryesojë i vetëm, në kuotën e 11 pikëve, edhe pse tashmë me vetëm një pikë epërsi ndaj Partizanit të vendit të dytë. Korçarët evitojnë kështu disfatën e parë në këtë sezon, teksa numërojnë 3 fitore dhe dy barazime. Nga ana tjetër, Tirana me këtë barazim vijon të jetë në pozita të vështira, e pozicionuar në vend të 7-të në kutëon e 5 pikëve, po aq sa Teuta e vendit të 8-të. Një ndeshje në të cilën jo pak protagonist u shndërrua edhe arbitri, pas protestave per dy kartonë të kuq të pa dhënë ndaj Skënderbeut, për Radas dhe Lulaj.
Skënderbeu-Tirana 1-1
Shënues: John 87’/ Hasani 20’
Skënderbeu: Teqja, Vangjeli, Radas, Aliti, Abazi, Muzaka, Lulaj, Demte, Gripshi, Bregu, Krasniqi.
Trajner: Orges Shehi
Tirana: Lika, Doka, Turtulli, Berisha, Imami, Daja, Maveje, Hasani, Kobina, Oduamadi, Blazhevski.
Trajner: Ze Maria
