Kur në vitin e largët 1948 Honda, e themeluar vetëm pak vite më parë, do të parashtronte idenë gjeniale për të vendosur një motor të vogël në një biçikletë, në mënyrë që të përshpejtonte lëvizjen, sigurisht që dyshimet ishin të mëdha.
E megjithatë, ajo që në atë kohë ishte thjesht një ide ose nevojë, sot e ka kthyer multindërkombëtaren japoneze në një superfuqi, që prodhon qindra mijëra modele motorësh, por edhe makinash me markën e saj, në të gjithë botën.
Një industri fitimprurëse, por edhe inovative. Nga Japonia e largët, ku zë fill historia, në Shqipëri, u desh pak kohë që kjo markë të bëhej e dashur, por nga dita e premte, në sajë të një eventi të prezantuar në Tiranë, kompania Imoto/ Honda, me administrator Idlir Ahmatin, do të nisë zyrtarisht shitjen e modeleve, qoftë edhe ekskluzive, të Honda-s, në sajë edhe të një koncesionari, i ndërtuar në fund të Komunës së Parisit, pra në Unazën e Re.
Në eventin prezantues ishin shumë të ftuar, qoftë persona VIP, por edhe të apasionuar pas motorëve, ashtu si team i Enduro-s, që siç dihet bëhet fjalë për motorët e krijuar enkas për garat në terrene të vështira.
Mbi dhjetë modele motorësh të vendosur në formën e panairit kanë tërhequr vëmendjen e të ftuarve, që kanë bërë edhe disa fotografi, teksa muzika ka ndezur më tej atmosferën.
Në lidhje me eventin e organizuar dhe këtë risi në Shqipëri, për “Telesport” foli edhe CEO, ose ndryshe administrator i deleguar, Idlir Ahmati.
Si lindi kjo ide për këtë bashkëpunim me Honda dhe për t’i dhënë shqiptarëve mundësi të njihen me botën e motorëve?
Imoto është një frymëzim nga disa njerëz që kanë parë të arsyeshme të bëjnë diçka ndryshe. Me pasion dhe përkushtim kemi menduar t’i ofrojmë konsumatorëve shqiptarë marka dhe brand që garantojnë siguri dhe jetëgjatësi. Urojmë që t’i ofrojmë komunitetit një mbulim 360 gradë duke mbuluar nevojat si zonat urbane, ashtu edhe interurbane. Pse jo, dhe për të bërë diçka e cila do të ketë një jetëgjatësi dhe të mos mbahet mend si brand motorësh.
Eshtë një bashkëpunim që mund të sjellë frytet në të ardhmen dhe a u ndoq një model që ishte në vendet e ndryshme në Europë?
Nëpërmjet kërkimeve që kemi bërë, kemi bërë kombinim modelesh, për adrenalinë, lëvizje, transport në tokë dhe det. Planifikojmë që të kemi edhe iMoto Marine apo Adventure, pra një këndvështrim i gjërë për sa i përket mjeteve të transportit.
Ku do të jetë Showroom, është vendosur?
Për herë të parë vendosëm për një Showroom në Tiranë, jo në zonat interurbane. Jemi pozicionuar në fund të zonës së Komunës së Parisit, në Unazën e Re, që të jetë e përshkueshme edhe në këmbë.
Mendoni se do të ketë sukses ky projekt apo bashkëpunim, ashtu si pretendoni?
Pse jo?! Ne mendojmë që një investim i kuruar në formën më të mirë, me produkte dhe shërbime që garantohen nga marka ndërkombëtare, nuk ka arsye që të mos arrijmë këtë sukses.
