Nga Boldnews.al
E ngjizur si Kryeprokurore e Përkohshme në kaosin parlamentar, në Dhjetor 2017, pas 9 muajsh, Arta Marku ka “lindur” një kaos brenda radhëve të institucionit.
Vendimet e diskutueshme të saj në vijimësi, por sidomos përplasja më e fundit me 10 prokurorë të Krimeve të Rënda, kanë shënjuar mandatin e saj, i cili nuk ka nisur mbarë që prej votimit të saj në Parlament,
Arta Marku, një prokurore e panjohur nga Shkodra, u vendos në karrigen e drejtimit të Prokurorisë së Përgjithshme falë lidhjeve të ngushta shoqërore me socialistët Ulsi Manja e Ermonela Felaj.
Ajo u zgjodh vetëm me 69 vota të Partisë Socialiste, ndërkohë që opozita PD-LSI e kundërshtoi ashpër procedurën për caktimin e Markut në atë detyrë.
Me marrjen e detyrës, puna e parë që bëri Arta Marku ishte largimi nga pozicionet e tyre të njerëzve që konsideroheshin si të afërt me paraardhësin e saj, Adriatik Llalla. Fillimisht u përplas me çiftin e bashkëshortëve prokurorë Rovena Gashi e Dritan Gina.
Nëpërmjet një procedure të dyshimtë ligjore, Marku firmosi shkarkimin e tyre nga detyrat drejtuese. Këto vendime u përballën në gjykatë dhe gjyqtarët, me shumë mundësi të trembur nga Vetingu i pritshëm, zgjodhën që të mbanin krahun e Arta Markut, e cila ka mbështetjen e plotë të qeverisë së Edi Ramës.
Më pas, me procedura tërësisht anti-ligjore, Arta Marku lëvizi drejtuesin e Prokurorisë së Durrësit, Agron Gjana, të cilin “e degdisi” prokuror në Punë. Brenda një muaji, Marku u bë “pishman” dhe e komandon Gjanën prokuror të thjeshtë në Tiranë.
Në vijim të procedurave anti-ligjore, Marku shkarkon edhe drejtuesin e Prokurorisë për Krime të Rënda, Besim Hajdarmataj, i cili njëkohësisht ishte edhe prokurori i çështjes “Tahiri-Habilaj”.
Megjithëse e largoi nga pozita drejtuese Hajdarmatën, ai sërish vijoi, si prokuror i thjeshtë, që të hetonte ish-ministrin e Brendshëm, Saimir Tahiri dhe kushërinjtë e tij trafikantë, Habilaj. Fakti që dosja “Tahiri” ishte ende në duart e Hajdarmatës duket se nuk ka qenë komode për Arta Markun dhe mbrojtësit e saj politikë.
Për këtë arsye, Kryeprokurorja e Përkohshme, nëpërmjet mikeshës së saj në krye të Krimeve të Rënda, Donika Prela, sajuan një “debat” për dosjen “Shullazi”. Në fakt, tashmë duket qartë se “penalizimi” i 10 prokurorëve rebelë, për të cilët Marku ka urdhëruar nisjen e procedimit disiplinor, është një skenar për të mbuluar largimin e Hajdarmatës nga dosja “Tahiri”.
Këto lëvizje të sipërcituara kanë bërë më shumë “lajm” se sa aktiviteti hetimor jo thjesht i vakët, por edhe pro-qeveritar i Arta Markut. Vetëm duke iu referuar të dhënave të bëra publike tashmë, konstatohet se dosjet hetimore në ngarkim të eksponentëve të lartë socialistë apo persona të lidhur me ata janë zbutur ndjeshëm apo janë pushuar.
Prej caktimit të Donika Prelës te Krimet e Rënda, prokurorët kanë hasur pengesa të shumta për të avancuar me hetimet për Saimir Tahirin. goditja e fundit për këtë hetim është pikërisht “transferimi” në Pogradec i prokurorit kryesor të çështjes, Hajdarmataj.
Prokuroria e Durrësit pushoi hetimet e nisura në vitin 2017 për kryebashkiakun e Durrësit, Vangjush Dako, i dyshuar për abuzime të mëdha në ndërtimin e Velierës në qendër të qytetit.
Gjatë periudhës së Arta Markut u liruan “për sjellje të mirë” ish-deputeti aleat i Edi Ramës, Mark Frroku dhe Ermal Hoxha i grupit të “Xibrakës.
Nuk është nisur asnjë hetim për Fatmir Xhafaj e Taulant Ballën, të dyshuar se kanë favorizuar grupe kriminale. Ndërkohë, është toleruar bashkëpunimi i mundshëm i deputetit socialist, Jurgis Çyrbja, me grupin e “Shullazit”
Janë stopuar hetimet e Krimeve të Rënda për Vangjush Dakon e Ardian Çelën e OSHEE-së, të cilët dyshohet se bashkëpunuan me një grup kriminal nga Shijaku për të siguruar vota për socialistët në zgjedhjet e përgjithshme të vitit 2017.
Nuk është nisur asnjë hetim për komisionerin e Vetingut, Lulzim Hamitaj, i dyshuar për “fallsifikim dokumentash”. Hamitaj, brenda radhëve të Komisionit të Vetingut, njihet si njeriu i Ëngjëll Agaçit, Sekretarit të Përgjithshëm të Kryeministrisë.
Pas këmbënguljes së opozitës, “Forca e ligjit”, së bashku me Arta Markun, deklaruan se nisën hetimin pasuror për bashkë të dënuarit me Agron Xhafën, të cilët qarkullojnë aktualisht dhjetra milionë euro në lojërat e fatit.
Lista e “tolerimeve” të Prokurorisë së Arta Markut është e gjatë dhe gjithnjë në favor të socialistëve. Të vetmet “lajme” që ka bërë Kryeprokurorja e Përkohshme në aspektin procedurial janë vetëm hetimet për paraardhësin e saj, Adriatik Llalla dhe për dy ish-zyrtarë të Autoritetit Rrugor Shqiptar, pjesë e partisë opozitare LSI.
