Tre oficerë policie kanë mbetur të vdekur nga një sulm me bombë në portën e përparme të Komisariatit të Policisë në provincën juglindore të Turqisë, Gaziantep, shkruajnë mediat turke duke cituar guvernatorin Ali Yerlikaya. Sulmi ka ndodhur mëngjesin e së dielës.
Të paktën 10 policë të tjerë dhe 4 civilë janë plagosur, në atë që dyshohet të ketë qenë një sulm me autobombë, apo makinë ku është vendosur eksploziv që më pas është aktivizuar ndoshta me telekomandë, ose mund të ketë pasur ndonjë kamikaz brenda.
Pamjet televizive të “CNN”-it turk raportuan që sulmi të ketë ndodhur pikërisht përpara hyrjes kryesore të komisariatit. Ndërkohë, pjesë të ndryshme të automjetit të hedhur në erë gjendeshin kudo.
Me dhjetëra ambulanca dhe automjete zjarrfikësish kanë mbërritur në vendngjarje, ndërsa shpërthimi mësohet të jetë dëgjuar kilometra larg. Agjenci të ndryshme lajmesh thonë se janë dëgjuar edhe të shtëna pas shpërthimit, por për këtë priten ende konfirmime.
