Partizani ka derdhur një breshëri golash në “Qemal Stafa” duke mundur Tërbunin me rezultatin 4-0. Të njëjtën gjë ka bërë edhe Skënderbeu në Korçë përballë Bylisit ndonëse disi më e rezervuar, në takimin e mbyllur me fitoren e kampionëve në shifrat 3-0. Është mbyllur pa asnjë surprizë e akoma më shumë pa asnjë ndryshim në klasifikim kjo javë e 32-të e kampionatit të Kategorisë Superiore. Të dy ekipet e kreut të klasifikimit vijojnë garën e tyre në kërkim të titullit kampion, teksa sot kanë fituar respektivisht Partizani ndaj Tërbunit dhe Skënderbeu përballë Bylisit. Dy duele ekstremitetesh, teksa në secilën ndeshje, gjendeshin përballë tyre ekipet kryesuese ndaj atyre që dergjen në fundin e klasifikimit.
Kur kanë mbetur edhe katër ndeshje nga përfundimi i kampionatit, gara për titullin kampion mbetet më e hapur se kurrë, teksa të dy ekipet kryesuese kanë fituar sot në ndeshjet respektive. Partizani, falë një bomberi në superformë, ka përsëritur rezultatin e takimit të fazës së dytë ndaj Tërbunit modest, duke fituar thellë me rezultatin 4-0. Protagonist kryesor dhe dominues është pa mëdyshje Xhevahir Sukaj, i cili realizoi një tregolësh personal, për të shkuar në kuotën e 19 golave në kampionat, ndërsa Partizani vijon ndjekjen e Skënderbeut, me vetëm 2 pikë më pak.
Skuadra e Skënderbeut, pas rikthimit te fitorja në javën e shkuar përballë Tiranës, ka konfirmuar sot edhe një herë rigjetjen e formës optimale dhe synimin për të mbajtur kreun, teksa ka mposhtur Bylisin në shtëpi me rezultatin 3-0. Një fitore e nisur nga bomberi i kampionatit, Hamdi Salihi dhe e shumëfishuar nga Xhejms. Ky i fundit është ritakuar me golin pas një kohe të gjatë, duke shënuar sot një dygolësh të rëndësishëm personal. Falë kësaj fitore, Skënderbeu vijon të mbajë i vetëm kryesimin me dy pikë avantazh ndaj Partizanit, ndërsa Bylis, mbetet me pikë të barabarta në vend të parafundit, në garë të hapur me Flamurtarin, për mbijetesë.
Skënderbeu – Bylisi 3-0
Shënues: Salihi 28’, Xhejms 34’, 73’
Skënderbeu: Shehi, Vangjeli, Jashanica, Osmani, Arapi, Latifi, Orelesi, Abazi, Xhejms, Salihi. Trajner: Mirel Josa
Bylisi: Frashëri, Muskaj, Alla, Bilali, Simiç, Peposhi, Tairi, Gava, Hyshmeri, Varea, Mbella. Trajner: Adnand Zilxhoviç
Partizani-Tërbuni 4-0
Shënues: Sukaj 20’ 46’, 65’, Vila 26’
Partizani: Xhika, Ibrahimi, Bicaj, Atanda, Trashi, Vila, Filipe, Daja, Fili, Torasa, Sukaj. Trajner: Andrea Agostineli
Tërbuni: Kuka, Kule, Tasiç, Çema, Borshi, Kaçaj, Gavazaj, H. Marku, Dedyn, Uilker, Jovanoviç. Trajner: Viktor Gjoni
