Goli numër 21 në La Liga nga Antonie Griezmann i ka dhënë Atletico Madrid fitoren 1-0 ndaj Rayo Vallecano dhe mundësinë për të mbajtur të hapur garën për titullin në kampionatin spanjoll. “Los Colchoneros”, që në mesjavën e ardhshme do të luajnë ndeshjen e kthimit në gjysmëfinalen e Champions League kundër Bayern Munich, nuk luajtën ndeshjen e tyre më të mirë, por arritën një fitore me shumë vlera dhe kryesojnë kampionatin të vetëm, me një pikë më shumë se Real Madrid, në pritje të ndeshjes së Barcelonës në fushën e Betis, pas disa orësh.
Episodi që vendosi fatet e ndeshjes ndodhi në minutën e dhjetë të pjesës së dytë. 30 sekonda pasi u aktivizua, Antonie Griezmann lëshoi një goditje të saktë me të majtën nga jashtë zone, e cila shkoi në cepin e portës, duke mos i dhënë asnjë mundësi reagimi portierit të Vallecano. Fernando Torres humbi disa mundësi për të shënuar golin e dytë për vendasit, megjithatë vlen për të përmendur se edhe Vallecano pati disa mundësi që nuk i shfrytëzoi. Vallecano mbetet në mes të luftës për “mbijetesë”, ndërsa Atletico vazhdon ëndrrën.
“Kjo ishte një fitore shumë e rëndësishme, sidomos për atë që përfaqëson në këtë pikë të sezonit. Kanë mbetur edhe dy ndeshje në kampionat dhe sfida e ardhshme mund të na çojë në finalen e Champions League. Skuadra duhet të shtrëngojë dhëmbët për të marrë shpërblimin e punës që ka bërë në këtë sezon,” – deklaroi trajneri i Atletico Madrid, Diego Simeone. Atletico Madrid fitoi 1-0 në gjysmëfinalen e parë ndaj Bayern Munich, teksa takimi i kthimit do të luhet të martën në “Allianz Arena”.
