Zëdhënsja e Partisë Demokratike, Ina Zupa ka denoncuar publikisht me anë të disa dokumentave se OSHEE e Ramës po vjedh shqiptarët me tendera që shkojnë për miqtë e tij.
“OSHEE thesari i madh i parave që Edi Rama ndan me miqtë e tij nuk ndalet në tenderimin pa shpallje, me negocim, me një operator të vetëm në garë, duke dhënë në çdo rast pothuajse fondin limit”, tha ajo në deklaratën për mediat.
Ajo tha se dje u denoncua skandali i vendosjes së 50 mijë matësve me 7 miliardë lekë, ndërkohë që kostoja sipas tregut është vetëm 1 miliardë. Ajo tha se OSHEE nuk u përgjigj se ku kanë shkuar 6 miliardë, por zgjodhi të sulmojë opozitën. Ndërkohë që po tek ky operator kanë marrë dhe vitin që shkoi makina me qira, 68 milionë lekë.
Me anë të disa dokumentave, ajo tregoi disa raste se çfarë bën “kjo bandë e Edi Ramën”, me paratë që u merren shqiptarëve me dhunë, me burg, me mbifaturim, e me ndëshkim me errësirë. “60 mijë euro OSHEE ia ka dhënë një koncesionari makinash, ‘Tirana Auto’, për këtë vit. I duhen bandës makina luksi për të marrë dhe qindarkën e fundit të shqiptarëve”, tha Zhupa.
“Vazhdon trajnimi i punonjësve, ku 670 milionë lekë i jepen të vetmit operator në garë, për 6 muaj punë. Mbi 100 milionë lekë në muaj, për trajnim, për letra”, u shpreh Zhupa.
Ajo shtoi në vijim se ka evente OSHEE, meqë çmimi i energjisë është rritur për qytetarët, meqë familjet mbifaturohen, meqë përfundojnë në errësirë kur një pjesë e mirë s’kanë mundësi të paguajnë. Sipas saj, 66 milionë lekë në vit për këto ahengje të OSHEE merr “Prosaundi i famshëm i fushatës së Partisë dhe i festave të Veliajt”, duke shtuar se këto pra janë disa nga bëmat e OSHEE-së. Ajo e cilësoi si bandë hajdute që Edi Rama ka vërsulur kundër popullit, për të marrë miliardat që i duhen oligarkisë. Zhupa e mbylli fjalën duke thënë se shumë shpejt do vijë koha që populli tu kthejë reston, e banda e OSHEE me kryehajdutin e saj në krye të japin llogari para ligjit.
