Nga Boldnews.al
Ministrja e Arsimit, Lindita Nikolla, vendosi t’i shmanget përballjes me 8-9-vjeçarët e klasave të treta të shkollës “Hasan Prishtina”, të cilët bojkotuan ditën e parë të shkollës në shenjë proteste ndaj arrogancës së drejtorit të institucionit arsimor dhe memecërisë së institucionit më të lartë arsimor.
Rreth 34 fëmijë, së bashku me prindërit e tyre, vendosën të mos paraqiten të Hënën në shkollë, derisa drejtoria e shkollës të pranojë se ka manipuluar shortin për caktimin e gjuhës së huaj për këta nxënës dhe të zhvillojë një tjetër proces, kësaj radhe të rregullt, sipas përcaktimeve dhe udhëzimeve të Ministrisë së Arsimit.
Në muajin Maj 2018, bashkësia e prindërve të klasës së II-B të shkollës “Hasan Prishtina” (sot, klasa e tretë), nënshkruan një peticion, në të cilin shprehnin kundërshtimin e tyre për mënyrën se si drejtoria e shkollës kishte paracaktuar që fëmijët e tyre ishin përzgjedhur që të zhvillonin gjuhën e huaj italisht. Në ankesën e tyre, prindërit shprehen se nuk janë aspak dakord me këtë përzgjedhje dhe duan që fëmijët e tyre të studiojnë, si të gjithë të tjerët, gjuhën angleze.
Në bazë të udhëzimit përkatës të Ministrisë së Arsimit, në arsimin parashkollor, gjuha e huaj në shkollat me më shumë se një të tillë, ndahet në bazë të shortit. Ky short duhet të jetë transparent dhe në prani të përfaqësuesve të prindërve.
Por, sipas peticionit të prindërve, i cili daton në Maj 2018, drejtori i shkollës Besnik Ekmekçiu, ka zhvilluar shortin në mungesë totale informacioni. Prindërit e kësaj klase janë vënë në dijeni për caktimin e gjuhës së huaj italisht, për vitin pasardhës shkollor për fëmijët e tyre vetëm pas një komunikimi informal me mësuesen kujdestare të klasës.
Ata, menjëherë kanë hartuar peticionin, i firmosur nga 95% e prindërve të nxënësve të kësaj klase, në të cilën kërkojnë nga drejtoria e shkollës që të respektojë transparencën dhe një proces të bazuar në procedura të rregullta.
Për shqetësimin e tyre, ata kanë vënë në dijeni edhe Ministrinë e Arsimit e, në mënyrë nominale, Ministren Lindita Nikolla. Ata kanë qenë në pritje të një reagimi si nga drejtoria e shkollës, po ashtu edhe nga ministrja Nikolla.
Të hënën e kësaj jave, si të gjithë fëmijët e tjerë në të gjithë Shqipërinë, edhe nxënësit e klasës së tretë të shkollës “Hasan Prishtina” janë paraqitur për të nisur vitin e ri akademik. Por, pasi kanë konstatuar se, pavarësisht ankesës së tyre të para 3 muajve nuk kishte asnjë reagim, as nga shkolla e as nga ministrja Nikolla, ata, të shoqëruar nga prindërit, kanë vendosur të bojkotojnë mësimin.
Ndërkohë që kjo protestë-bojkot, e rrallë në llojin e saj, për shkak të moshës së fëmijëve, zhvillohej në një shkollë kryesore të Tiranës, ministrja Nikolla uronte nxënësit shqiptarë për ditën e parë të mësimit nën llamburitjen e prozhektorëve mediatikë nga shkolla “Kosova”.
Ministrja Lindita Nikolla zgjodhi që të injoronte fëmijët 8-9 vjeçarë të shkollës “Hasan Prishtina”, duke mos u dhënë asnjë përgjigje shqetësimit të tyre. Zonja Nikolla është ajo ministrja, e cila, në çdo dalje publike, nuk harron të përmendë se ka qenë vetë mësuese filloreje dhe se ka një debolesë të veçantë për fëmijët e sistemit parauniversitar.
Përtej qëndrimeve të saj deklarative, Nikolla ka shënuar ditën e parë të vitit shkollor 2018-2019 një rekord, pothuajse absolut-ka nxitur fëmijët e klasave të treta që të protestojnë dhe të bojkotojnë mësimin. Rezultat i shkëlqyer, ky i ministres Nikolla, në arsimin, por edhe në demokracinë shqiptare.
