Kryepeshkopi i Kishës Ortodokse Autoqefale të Shqipërisë, Janullatos ka uruar të gjithë besimtarët për festën e pashkëve, e cila këtë vit festohet në datë 1 maj.
Gjatë urimit të tij, Janullatos është shprehur se dëshpërimi ka mbërthyer zemrat e shqiptarëve. Kjo si shkak sipas tij të varfërisë, shpifjeve dhe padrejtësive.
“Në ditët tona një dëshpërim shumëformësh dhe i papërcaktuar ka pushtuar zemrat e njerëzve. Shumë gjëra që ndodhin rreth nesh dëshmojnë se sundon padrejtësia dhe urrejtja ndërsa e vërteta minohet. Ata që përpiqen të jetojnë të virtytshëm bëhen pre e shpifjeve dhe përndiqen nga qarqe të errëta. Dhe kjo ndodh në jetën e secilit prej nesh, në rrafsh lokal dhe global”, shprehet kryepeshkopi dhe shton se e kremtja e Pashkës vjen që të shpërbëjë retë e dëshpërimit dhe të na çlirojë nga prirja për të mbetur “të vonuar në zemër për të besuar”, ka thënë Janullatos.
Pashka Ortodokse është mbi të gjitha një përvjetor që feston jetën dhe triumfin e saj mbi vdekjen.
Tradita e vezëve të kuqe ka origjinë të lashtë dhe është dokumentuar në epokën e Perandorisë romake, kur fshatarët paganë fusnin nën tokë një vezë të lyer me të kuqe për të marrë me të mirë perënditë për bollëk të të korrave.
