Nga Boldnews.al
Pak ditë më parë, “burime të Prokurorisë” shpërndanë informacion se ka nisur hetimi për komisionerin e Vetingut, Lulzim Hamitaj, i akuzuar publikisht dhe me dokumenta nga opozita se ka fallsifikuar dokumentat e aplikimit për pozicionin e punës që mban aktualisht.
Ky reagim i Prokurorisë, megjithëse shumë i vonuar, rreth 50 ditë me vonesë, gjithësesi duhej përshëndetur, nëse do të rezultonte i vërtetë. Por, dokumentat zyrtare të “Boldnews.al” dëshmojnë se Prokuroria nuk ka nisur asnjë hetim për Lulzim Hamitaj. Prokuroria e Tiranës thjesht e ka përfshirë këtë rast në veprimet e saj administrative e burokratike, të cilat nuk kanë asnjë lidhje me hetimin penal.
“Boldnews.al” iu drejtuar zyrtarisht Prokurorisë së Tiranës për të mësuar nëse ka nisur një hetim penal ndaj Lulzim Hamitaj, i akuzuar se ka fallsifikuar dokumentin e njohjes së gjuhës së huaj.
Në përgjigje të kërkesës së redaksisë, Prokuroria e Tiranës shprehet se: “…Ju informojmë që, mbi bazën e dokumentave të publikuara në media për shtetasin Lulzim Hamitaj, Prokuroria e Tiranës ka regjistruar kallëzimin penal nr. 11642 dhe janë duke u kryer verifikimet e nevojshme“.
Në pamje të parë, për njerëz të cilët nuk janë familjarë me procedurën penale, duket që me të vërtetë Prokuroria ka nisur hetim. Por, si në çdo fushë tjetër, edhe në veprimtarinë e Prokurorisë, “djalli fshihet në detaje”.
Mjafton ta analizojmë shkurtimisht qëndrimin zyrtar të Prokurorisë së Tiranës. Në përgjigjen e tyre është e qartë se institucioni e ka marrë indicjen nga publikimet mediatike (në fakt, dokumenta të publikuara nga Partia Demokratike në një konferencë të posaçme për median në 30 korrik 2018).
Por, megjithëse indicja është marrë nga media, Prokuroria deklaron se “ka regjistruar kallëzim penal…”. Pikëpyetja e parë që ngrihet është: nëse indicja e Prokurorisë ka ardhur nga media, kush e ka bërë kallëzim penal? Në fakt, nuk ka asnjë kallëzim penal ndaj Lulzim Hamitaj dhe Prokuroria e ka nisur kryesisht hetimin, pas presionit publik që iu bë nga opozita për mefshtësinë e saj ndaj rastit.
Por, përse Prokurorisë i intereson ta konsiderojë “kallëzim penal” rastin konkret? Në rastet e kallëzimeve penale, Prokuroria ka mundësinë që të kryejë verifikimet paraprake, të cilat zgjasin maksimumi deri në 30 ditë. Në përfundim të veprimeve paraprake, Prokuroria mund të vendosë që të regjistrojë procedimin penal ose të vendosë mosfillimin e hetimeve, atëherë kur nuk ka elementë të veprës penale.
Në rastin konkret, për Lulzim Hamitajn, Prokuroria e ka nisur procedurën e saj me inisiativë ose kryesisht, siç njihet në terminologjinë juridike. Në rastet e hetimeve të nisura kryesisht prej saj, prokuroria ka detyrimin që të regjistrojë procedimin penal menjëherë dhe të gjitha veprimet pasuese nuk konsiderohen “verifikime”, por “hetime”.
Nisur nga “lojërat e fjalëve” që ka zgjedhur të veprojë prokuroria e Tiranës në këtë rast, krijojnë dyshimin e fortë se tashmë vendimmarrja është e paracaktuar-në përfundim të “veprimeve verifikuese”, Prokuroria nuk do të zbulojë elementë të veprës penale dhe do të vendosë mosfillimin e procedimit penal ndaj Komisionit të Vetingut, Lulzim Hamitaj.
Komisioneri Hamitaj, së bashku me kolegët e tij të Komisionit të Pavarur të Kualifikimit, kanë vendosur shkarkimin e gjyqtarëve e prokurorëve të ndryshëm për faktin se kontratat për pasuritë e tyre nuk janë nënshkruar sipas përcaktimeve strikte ligjore. Ndërsa në rastin e tij, kur falsifikimi i dokumentave duket qartë edhe në ato që janë bërë publike tashmë, asnjë institucion, përfshirë KPK, Operacionin Ndërkombëtar të Monitorimit e Prokurorinë, nuk e vlerësojnë të marrin masat disiplinore e penale për këtë shkelje të komisionerit Hamitaj, e cila “cënon rëndë besimin e publikut tek institucionet”.
