Nga një kamp i refugjatëve në Ligën e Kampioneve, Alphonso Davies e ka një histori të mrekullishme. 17-vjeçari kanadez pritet t’i bashkohet Bayern Munichut për 19 milionë euro në janar nga Vancouver Whitecaps, ky do të jetë çmimi më i lartë i paguar për një lojtar nga Major League Soccer.
Alphonso Davies deri më tani i ka bërë 50 paraqitje për skuadrën e Vancouverit. Ai e bëri debutimin për Kombëtaren e Kanadasë në moshën 16-vjeçare pasi e kishte marrë shtetësinë kanadeze.
Ai ka lindur në një kamp refugjatësh në Ganë në vitin 2000. Kur Lufta e Dytë Civile e Liberisë filloi, prindërit e tij, Victoria dhe Debeah Davies u larguan nga vendlindja e tyre.
“Është dashur që të kalosh nëpër trupat e vdekur për të gjetur ushqim”, tha nëna e tij. “Ka qenë e vështirë, ka qenë e rrezikshme”, tha babai i tij.
“Ishte e vështirë që të jetoje atje sepse e vetmja mënyrë që të mbijetoje ishte të bartje armë. Dhe ne nuk ishim të interesuar që të përdornim armë”.
Ata udhëtuan me qindra kilometra nga Afrika Perëndimore, duke e gjetur një kamp të refugjatëve në Buduburam në Ganë. Fëmija i tyre, Alphonso, ka lindur më 2 nëntor të vitit 2000, dhe i kaloi pesë vitet e tij të para në atë kamp.
Ai në moshën 15-vjeçare është vërejtur nga skautët e Vancouverit, dhe zyrtarisht është bërë me kontratë të klubit kanadez.
Ai cilësohet si Gareth Bale i ri. Për të janë interesuar disa klube nga Premierliga, si Manchester Unitedi, Chelsea dhe Liverpooli, mirëpo oferta e klubit gjerman ishte më e vështirë për t’u zmbrapsur.
