Për klubet shqiptare është bërë e zakonshme tashmë që për të pasur tifozë në transfertë, drejtuesit duhet t’u sigurojnë atyre udhëtimin drejt qytetit përkatës ku zhvillohet ndeshja.
Duket se një strategji të tillë është gati të ndjekë edhe Aurelio De Laurentis, presidenti i Napolit, por për ndeshjet brenda fushe.
Plani i tij është që në të ardhmen, të dërgojë tifozët e Napolit në Bari, pasi synon që të luajë aty ndeshjet e Ligës së Kampioneve meqë është një stadium shumë më i mirë.
“I kam kërkuar UEFA-s autorizimin për të luajtur ndeshjet e Ligës së Kampioneve në ‘San Nicola’ të Barit. Jam i gatshëm të paguaj 1 mijë autobusë në çdo ndeshje për të çuar tifozët e Napolit atje”, ishin fjalët e De Laurentis i cili ka saktësuar se tani për të është më e rëndësishme të ecë përpara në Ligën e Kampioneve.
“Është e rëndësishme të rritim të ardhurat duke shkuar sa më larg. Objektivi i vërtetë është Liga e Kampioneve. Pastaj nëse arrijmë të fitojmë edhe titullin në Itali… por aty janë 38 ndeshje dhe jo 13. Gjithsesi, të fitoj titullin nuk sjell më shumë fitime, me Ligën e Kampioneve mund të blej lojtarë më të rëndësishëm”, shpjegoi ai.
