Qytetarët në Lezhë kanë dalë në protestë duke akuzuar OSHEE për mbifaturim të energjisë elektrike.
Ata u janë drejtuar sporteleve me librezat e energjisë elektrike për të saqaruar kilovatët e tepërt të faturuar.
Disa prej tyre shprehen se janë ankuar disa herë të tjera, por nuk kanë marrë zgjidhje. U thonë se faturimet janë bërë sipas konsumit dhe se gjithçka është në rregull. Por banorët shprehen se atyre nuk u vjen asnjë faturist nëpër shtëpi që të shohë sahatët dhe se faturimet bëhen me hamendje. Disa të tjerë kanë refuzuar ta paguajnë faturën, pasi nuk kanë marrë përgjigje për ankesat e mëparshme. Në këtë mënyrë rrezikojnë që OSHEE t’u ndërpresë energjinë, por ata thonë se nuk shohin asnjë rrugëzgjidhje tjetër përballë indiferencës së OSHEE për të shqyrtuar si duhet ankesat e tyre.
“Kam ardhur të sqarohem dhe të bëj ankesë. Këto thonë nuk e bëjmë. Duhet të shkosh në Tiranë më thanë”, thotë një qytetar për mediat që sot janë thirrur nga PD e Lezhës për të parë nga afër situatën.
“Përsëri kanë bërë të njëjtin kalim kur unë u ankova për mbifaturimin. E njëjta gjë më ka ardhur në muajin mars. Asgjë nuk po gjen zgjidhje. Më thanë se do të më sillnin mesazh për problemin e mbifaturimit. Nuk erdhi asnjë mesazh, as kontroll, asgjë. Ne nuk dimë më ku të shkojmë, ku të mbytemi. Na thonë shko tek drejtori, ai nuk është. Kthehemi prapë këtu, këto nuk na zgjidhin gjë”, shprehet një tjetër.
Denoncimet vijojnë për abuzime të ndryshem të pretenduara nga konsumatorët:
“870 mbifaturim më ka ardhur këtë muaj, ja fatura, e kam parë numrin e sahatit e kam sjellë kopje, kam depozituar ankesën, prej dy javësh. Nuk ka ardhur askush as me pa sahatin. Ka ardhur një elektricist në fillim të muajit, por ata e heqin atë që ka parë sahatin. Këtu i kam të gjitha të dhënat që i kam sqaruar dhe në kërkesë. Këto punonjëset më thonë ankohu, por ku? Ka dy tri javë që është bërë ankesa, por nuk vjen kërkosh”.
“692 kilovat më ka ardhur, nga 400 që shënon sahati. Këta punonjës nuk japin asnjë përgjigje asnjë sqarim”.
“Mbifaturimin ma kanë bërë dhe në dhjetor. Unë jam klient i rregullt. Shteti nuk duhet të na vjedhë. Nqse shteti ka nevojë për lëmoshë ia japim, por jo të na vjedhë. Drejtori më thotë pas 60 ditësh do të vijmë ta verifikojmë. Pas 60 ditësh unë nuk e di ku do të jem. Ta verifikojnë sot nesër, jo kaq vonë”.
Banorët i kërkojnë OSHEE të ndalë abuzimet, ndësa opozita e akuzon atë se është përfshirë në një skemë vjedhjeje masive të qytetarëve. Kjo nuk është hera e parë që OSHEE është nën akuzë për mbifaturim të energjisë elektrike.
