Ditët e punës janë reduktuar në vetëm 2 për punonjësit e sektorit publik në Venezuelë, të cilët janë rreth 2,8 milionë të punësuar.
Kjo nuk ka ardhur si shkak të mirëqenies, por është një nga masat e përkohshme të ndërmarra nga qeveria për t’i bërë ballë krizës energjetike që ka kapluar vendin.
“Nuk do të ketë më punë për sektorin publik, përveç të hënës e të martës, përjashtim bëjnë vetëm funksionet e nevojshme”- ka bërë të ditur Zv/ Presidenti Aristobulo Isturiz gjatë një vizite në hidrocentralin e El Guri në Bolivar, që gjeneron 70 % të energjisë elektrike për Venezuelën.
Madje nga vendimi nuk përjashtohen as kopshtet e shkollat të cilat do të jenë pushim edhe ditën e premte.
