Qysh prej shkëputjes nga “Portokalli”, aktorët e humorit Besart Kallaku dhe Erion Isai, janë parë në projekte të përkohshme, por jo në një angazhim që të zgjasë në kohë.
Tashmë me nisjen e sezonit të ri televiziv, bashkë me ta është bashkuar edhe Olsi Bylyku, i njohur si “Kimikati”, i cili ka lënë “Portokallinë”, për të vijuar një projekt të ri me dy kolegët.
Ndërsa prej kohësh Besi dhe Erioni kishin thënë se po punonin për një projekt, mësohet se ai do të jetë në televizionin Klan. Kjo pasi me anë të një fotografie të publikuar në Instagram, prej Erion Isait dhe Ardit Gjebresë, shihen tre aktorët, moderatori dhe drejtori i televizionit Aleksandër Frangaj.
Me sa kuptohet Besi, Erioni dhe Olsi, do të jenë pjesë e emisionit të së dielës të drejtuar nga Gjebrea. Megjithatë pas pak ditësh pritet të mësojmë konkretisht se cili do të jetë roli i tre aktorëve të humorit.
