Një futbollist që ka qenë në xhiron e Kombëtares Shqiptare të Futbollit, është dënuar nga Gjykata e Tiranës me një muaj burg. Franc Veliu, 27 vjeç, që luan aktualisht për skuadrën e Partizanit, është kapur pak kohë më parë duke drejtuar automjetin në gjendje të dehur.
Bold News ka siguruar ekskluzivisht vendimin e gjykatës, ku detajohet e gjitha ngjarja, e mbajtur deri më sot sekret, për shkak të karrierës futbollistike të mbrojtësit vlonjat. Ai u kap më 24 tetor të vitit të kaluar në Tiranës nga një autopatrullë policie, e cila i preu letrat për në qeli. Në atë kohë, Veliu luante për skuadrën e Kukësit, ndërsa më pas ka prishur kontratën, duke nënshkruar për Partizanin. Nuk dihet arsyeja e këtij transferimi, ndërsa arrestimi nga policia, apo drejtimi i mjetit në gjendje të dehur, mund të jenë bërë shkak për prishjen e njëanshme të kontratës.
Sipas vendimit të gjykatës, më datë 24 tetor 2015, rreth orës 03:30, shërbimet e policisë kanë kapur në flagrancë në vendin e quajtur pranë nënkalimit të Unazës së Re, tek liqeni i thatë, Tiranë, të pandehurin Franc Veliu, i cili po qarkullonte duke drejtuar një automjet të markës “BMW”, me ngjyrë të zezë, me targa AA 345 FI. Pasi i është bërë shenjë për të ndaluar mjetin, Franc Veliut i është kërkuar dokumentacioni i mjetit dhe nga komunikimi me të, policët kanë dyshuar se ai mund të kishte përdorur pije alkoolike. Në këto kushte është kryer shoqërimi i të pandehurit për verifikime të mëtejshme në Policinë e Tiranës si dhe për t’iu nënshtruar testit për vërtetimin e konsumimit të alkoolit.
Sipas procesverbalit të testimit të drejtuesit të mjetit për konsumim alkooli nëpërmjet aparatit alkoolmatës “Drager”, të datës 24 tetor 2015, të përpiluar nga punonjësit e policisë ka rezultuar se i pandehuri kishte konsumuar pije alkoolike, e vërtetuar kjo me dy fletët e printuara për testimin e drejtuesit të mjetit për konsumim alkooli nëpërmjet frymëmarrjes me anën e aparatit alkoolmatës të llojit “Drager”, të datës 24.10.2015, ora 03:30 min dhe ora 03:46 minuta. Mësohet se Veliu kishte konsumuar pije alkoolike, në masën mbi 0.5 %, (nga treguesit evidentohet 0.63 mg/L e 0.64 mg/L).
Në këto rrethana, më datë 24.10.2015, ora 06:30 shërbimet e policisë gjyqësore kanë kryer arrestimin në flagrancë të të pandehurit Franc Veliu, si person i dyshuar për kryerjen e veprës penale që i atribuohet në këtë gjykim.
Më datë, 24.10.2015, Gjykata e Tiranës ka vleftësuar si të ligjshëm arrestimin në flagrancë të të pandehurit Franc Veliu dhe është caktuar ndaj tij masa e sigurimit personal “detyrim për paraqitje në policinë gjyqësore”.
I pyetur në fazën e hetimeve paraprake të çështjes, Franc Veliu e ka pranuar veprimin e kryer si dhe ka shpjeguar se ditën e ngjarjes kur është ndaluar nga patrulla e policisë ai kishte konsumuar pije alkoolike nga gëzimi për rast familjar (fejesë), por nuk kishte menduar se kishte pirë tej limitit të lejuar
Në fund, gjykata çmoi se në veprimet e të pandehurit Franc Veliu janë të pranishëm të gjithë elementët që kërkon legjislacioni penal shqiptar për t’i cilësuar këto veprime si elementë të figurës së veprës penale të “drejtimit të automjeteve në mënyrë të parregullt”. Gjykata e dënoi me 45 ditë burg, ndërsa ia reduktoi me 30 ditë për shkak se i pandehuri kishte pranuar akuzën. Por, edhe kjo masë e dënimit iu konvertua në një gjobë pre 150 mijë lekë të reja.
Vendimi i Gjykatës për futbollistin
SKEDA FUTBOLLISTIKE
Franc Veliu
Datëlindja: 11 nëntor 1988 (27 vjeç)
Vendlindja: Vlorë
Gjatësia: 1.86 m
Pozicioni: Mbrojtës
Klubi aktual: Partizani
Karriera në klube
2006–2015: Flamurtari Vlorë, 210 (14 gola)
2015–2016: Kukësi, 8
2016 e në vazhdim: Partizani
Kombëtarja
2008–2009: Shqipëria U21, 8 ndeshje
2009–2013: Shqipëria, 7 ndeshje
Trofetë
2008-2009: Fitues i Kupës së Shqipërisë me Flamurtarin
2013–2014: Fitues i Kupës së Shqipërisë me Flamurtarin
(Boldnews)
