Lidhja e krimit me shtetin, mbetet problemi më i madh për LSI. Teksa iu referua për herë të dytë sulmit me armë ndaj banesës së prindërve të gazetares Klodiana Lala, kryetarja e LSI Monika Kryemadhi tha se “kriminelët nuk kanë se si të frikësohen nga ligji, kur në krye të shtetit është një kryekriminel”.
“Shqipëria është në një alarm të madh dhe një alarmi të madh duhet t’i përgjigjemi me një front të madh kombëtar. Situata në të cilën gjendet sot Shqipëria është një nga situatat më të këqija që ka pasur ndonjëherë. Është në kufijtë e humbjes së identitetit të saj. Është në kufijtë e rrëzimit të shtetit të saj. Vërtetë shteti shqiptar në këto vite tranzicion ka qenë shumë i dobët, por në njëfarë mënyre shteti shqiptar në këto vite tranzicion ka qenë shumë i dobët por në njëfarë mënyre kriminelët kanë pasur një lloj frike nga shteti. Sot kriminelët nuk kanë më frikë nga shteti sepse shteti është në duart e tyre. Kanë pasur frikë nga gjykatat, dëgjojmë deklaratat qesharake që thonë kanë frikë nga drejtësia kriminelët. Jo jo, po të ketë frikë nga drejtësia krimineli, nga Reforma në Drejtësi nuk qëllon qytetarët me kallashnikov në derën e shtëpisë. Po të ketë frikë krimineli nga Reforma në Drejtësi nuk bën këtë krim që bëhet sot në rrugët e Shqipërisë”, tha ajo.
Gjatë takimit me komitetin drejtues kombëtar të LRI-së Kryemadhi u shpreh se synim kryesor i partisë së saj mbetet që t’iu kthejë besimin të rinjve për të mos u larguar nga Shqipëria, edhe pse sipas saj varfëria po thellohet çdo ditë.
“Po të ketë frikë krimineli nga Reforma në Drejtësi nuk do të ishim në këtë gjendje që ishim sot. Pse? Sepse kryekrimineli, kryeministri shqiptar është ai që orienton dhe drejton dorën e krimit të organizuar. Sot shqiptarët janë më të varfër, paguajnë taksa më të larta, kanë energjinë elektrike më të lartë, kanë çmimin e bukës më të lartë. Sepse si rezultat i rritjes së taksave nga qeveria, rriten dhe çmimet e ushqimeve. Por ajo çka është më qesharake është që pagat e shqiptarëve jo vetëm që nuk janë rritur por kanë filluar dhe të zhvlerësohen çka do të thotë që mënyra e jetesës, standardi i jetesës së shqiptarëve çdo ditë e më shumë po ulet. Pra po rritet varfëria gjë që do të sjellë veç dëshirë epidemike po themi të shqiptarëve për tu larguar nga Shqipëria. Prandaj misioni i rinisë shqiptare është që të rikthejë këtë dëshirë, këtë angazhim të të rinjve shqiptar për të qëndruar në Shqipëri. Për të ndryshuar këtë realitet të hidhur, sepse ndoshta në njëfarë mënyre edhe neglizhenca apo indiferenca e klasës politike ndaj të rinjve ka bërë që rinia të humbasë besimin te politika. Na duhet që ne të rikthejmë këtë besim. Këtë besim nuk do ta arrijmë duke i bindur njerëzit thjesht me fjalë të bukura por duke bërë aksionin politik”, u shpreh kryetarja e LSI.
Kryemadhi paralajmëroi ditë të nxehta për politiken këtë vjeshtë, duke iu referuar projektit të Teatrit Kombëtar, që ajo e cilësoi grabitje e kulturës dhe historisë.
