Policia mësohet se ka nisur një procedim për veprën penale vrasje e mbetur në tentativë lidhur me sulmin e armatosur ndaj banesës së prindërve të gazetares Klodiana Lala. Dosja hetimore i ka kaluar Prokurorisë së Tiranës për hetime të mëtejshme. Deri më tani, autoritetet hetimore nuk kanë njohur për persona të dyshuar apo të ndaluar lidhur me sulmin me armë zjarri.
Ngjarja ndodhi orët e para të mëngjesit të djeshëm. Në drejtim të banesës së prindërve të gazetares në periferi të Tiranës u qëllua me armë zjarri rreth orës 3. Fatmirësisht nuk pati të lënduar. Autorët e krimit janë ende të paidentifikuar nga policia, që njoftoi se po punon për zbardhjen e ngjarjes. Sulmi me armë solli reagime të shumta, që nga kolegët e gazetares e deri figurat e institucionet kryesore të politikbërjes në vend. Madje, edhe një proteste u zhvillua para Kryeministrisë, në shenjë solidariteti me gazetren pasditen e djeshme. Vetë Klodiana Lala, në një reagim, tha se dyshon se sulmi ka ardhur për shkak të punës së saj si gazetare.
