Blerim Krasniqi duhet të mbajë peshën e të larguarit Ali Sowe në sulmin e Skënderbeut gjatë këtij sezoni. Fillimi nuk ka qenë shumë i mirë për sulmuesin e talentuar i cili në dy ndeshjet e para nuk e ka gjetur ende rrugën e rrjetës, megjithatë ish lojtari i Apolonisë është i kënaqur me ecurinë e skuadrës dhe në konferencën për shtyp të kësaj të marte nga kampi korçar foli si një lider i vërtetë.
“Fillimi është i rëndësishëm, por mund të them që është po i njëjti Skënderbe, edhe pse ka pasur largime nga lojtarët e vjetër. Besoj se do shkojmë edhe më mirë. Më mungon goli, por futem me ndjenjën që të shënoj, më pas varet nga fusha. Edhe shansi ka rëndësinë e vet. Është ndryshe nga ndeshja e Superkupës, ishte ndeshja e parë, tani luajmë në shtëpinë tonë, edhe pse pa ndihmën e tifozëve, besoj se do bëjmë më të mirën. Pastaj, fitorja vendoset në fushë. E rëndësishme është fillimi. S’duhet t’i trembemi asnjë ekipi. Të gjitha ekipet kanë ndërtuar skuadra të mira, por ne as nuk duhet t’i mbivlerësojmë, por as t’i nënvlerësojmë”.
Krasniqi nuk i shmang elozhet as për dy partnerët e tij në sulmin e korçarëve, Bregun dhe Gripshin ndërsa flet edhe për afrimin më të ri, Realdo Filin.
“Është komoditet të kem në krah Bregun dhe Gripshin. Edhe ata janë djem të rinj si unë, dhe kanë dëshirë për të luajtur. Atë pastaj e vendos stafi dhe trajneri. Të gjithë jemi të barabartë dhe gati për të qenë në fushë. Çdo person që është këtu, duhet ta dijë se është i rëndësishëm, pavarësisht se është në stol apo në fushë. Të gjitha ekipet janë anti-Skënderbeu, të gjithë duan të na mundin. Është akoma herët për të thënë se kush do jetë më afër nesh. Fili? E kam shok dhe kemi luajtur bashkë, ai ka pozicion tjetër dhe unë tjetër. Pavarësisht se sapo ka ardhur, i uroj më të mirën”.