Atmosfera tek Manchester United është në gjendjen më të rëndë, që kur Sir Alex Ferguson la klubin. Jose Mourinho është në presion shumë të lartë për të marrë rezultate pozitive, pas humbjes me Brighton 3-2 javën e kaluar, e humbjes së kontrollit të grupit.
Sipas mediave angleze, Paul Pogba është “në luftë” me portugezin, ndërkohë që vetë trajneri nuk ka marrëdhëniet më të mira as me zëvendës-presidentin e klubit, Ed Woodward.
Mourinho është i zhgënjyer për merkaton e vakët që drejtuesit kanë bërë, ku blerjet e vetme ishin ato të Fred dhe Dalot. E pavarësisht tensioneve që kanë kapur majën, familja Glazer dhe bordi drejtues nuk do ta heqin Mourinhon, pasi do të detyroheshin t’i jepnin ish-trajnerit të Chelsea e Inter një kompensim prej 50 milionë paundësh.
Aktualisht vlera e lojtarëve të skuadrës nga Manchester, kap shifrën e 700 milionë paundëve, e drejtuesit mendojnë se Mourinho duhet të marrë më të mirën nga grupi që ka në dispozicion.
Ditën e hënë United do të ndeshet me Tottenham, ku një fitore do të qetësonte disi situatën e krijuar. E ndërkohë, emri i Zinedine Zidane vazhdon të përflitet akoma më shumë, në rast shkarkimi të “Special One”.
