Kastrioti e nisi kampionatin duke befasuar për mirë të gjithë opinionin sportiv në Shqipëri. Triumfi i krutanëve në Gjirokastër ndaj Luftëtarit nuk ishte rastësi, por fryt i një pune të filluar shumë herët nga trajneri Plori.
Tashmë Kastriotin e pret një tjetër duel akoma më i vështirë përballë kampionëve në fuqi të Skënderbeut, një takim që tekniku shkodran e vlerëson në maksimumin e mundshëm.
“Të gjitha ndeshjet janë të forta, të paktën kur i shikon në letër. Edhe Skënderbeu, pavarësisht largimit të disa lojtarëve, ka ende shumë emra me eksperiencë, por edhe talente në përbërje. Megjithatë ne jemi pak më të qetë dhe besoj se nuk do e kemi atë stresin që patëm në ndeshjen e parë. Lojtarët janë më entuziastë, pasi kemi marrë një tre pikësh dhe gjendja psikologjike është dukshëm më e mirë, ndaj shpresoj të nxjerrim më të mirën në këtë ndeshje”, deklaroi Plori.
Kundër një ekipi me potencial të rëndësishëm si Skënderbeu edhe barazimi do të kishte vlerën e një fitoreje për Kastriotin.
“Unë do të jem shumë i kënaqur edhe me një pikë. Duhet të jemi me këmbë në tokë dhe të kuptojmë që po luajmë kundër Skënderbeut. Do të jem I kënaqur me barazimin, mjafton që të luajmë si në ndeshjen e parë”, u shpreh trajneri shkodran i Kastriotit.
Tekniku 40-vjeçar pranon se ekipi ka ende nevoje të përmirësohet dhe kërkon të mbaje me këmbë në tokë futbollistët e tij.
“Na duhen më shumë lojtarë që luajnë në krah dhe për më tepër, një sulmues që i përshtatet lojës që kam dëshirë të aplikoj në te Kastrioti. Mos të dalim jashtë kontureve, pasi nuk dua një skuadër sulmuese, por një skuadër që luan në ekuilibër. Objektivi që kemi të gjithë bashkë, është që të mbetemi në Kategorinë Superiore”, deklaroi Elvis Plori.
