Ancelotti i bindur: Sjellim titullin në Napoli
Merkatoja e Serisë A u mbyll të premten e kaluar, ndërsa mes skuadrave të mëdha, Napoli ishte më pak aktivi, duke humbur një organizator si Jorginho dhe duke afruar lojtarë pa eksperiencë në Serinë A.
Gjithsesi blerja e vërtetë e napolitanëve ishte emërimi i Carlo Ancelottit në stol, pasi me largimin e Sarrit, De Laurentiis nuk do të mund të kishte bërë zgjedhje më optimale.
Pavarësisht mungesës së protagonizmit në merkato, Carlo Ancelotti ka theksuar se ka ardhur plot ambicie në krye të pankinës së Napolit dhe se do të garojë bashkë me skuadrën, për të sjellë titullin e munguar prej vitesh.
“Synimi im është të çoj skuadrën në gradën më të lartë të kampionatit. Kam gjetur shumë kualitet te kjo skuadër, që për arsye të ndryshme nuk ia ka dalë të fitojë titullin, por i ka shkuar shumë pranë. Gjithsesi, shpresoj që ky kualitet, duke i shtuar edhe eksperiencën time, të sjellë titullin në qytetin e Napolit”, deklaroi Don Carlo.
Ancelotti u largua nga Italia në verën e 2009-ës, për të nisur një tur të gjatë në Europë, duke filluar nga Chelsea dhe për të vijuar më pas me PSG-në, Realin e Madridit dhe Bayernin e Mynihut, praktikisht skuadrat më të mira të ligave europiane.
Këtë verë tekniku dy herë fitues i Ligës së Kampionëve u rikthye në Itali, ndërsa në intervistën e dhënë për transmetuesin më të ri të Serisë A, DAZN, shpjegon edhe arsyet pse vendosi t’i bashkohet Napolit.
“Pikë së pari doja të rikthehesha në Itali dhe të flisja gjuhën time. Kur komunikoj italisht me lojtarët, më duket sikur e bëj më mirë punën time, pasi arrij të përçoj në mënyrën e duhur mesazhet që kam. Pastaj një rol të rëndësishëm në vendimmarrjen time, ka natyrisht edhe projekti që më ofroi presidenti De Laurentiis”, deklaroi Ancelotti.
Të shtunën në mbrëmje Napoli do të presë në “San Paoli” melanin, një skuadër të cilën Ancelotti e ka drejtuar për 8 vite, për që këtë herë do të kërkojë ta mundë dhe t’i japë rrugë startit perfekt në transfertën e javës së parë me Lazion.
“Milani përfaqëson një pjesë të rëndësishme të historisë time, pasi aty kam shijuar sukseset e para si trajner. Sa i përket Gattusos, mund të them se mbetet i njëjti që ka qenë edhe si futbollist. Po të shikosh Milanin, luan me kujdes, e mirëorganizuar, kompakte dhe agresive, cilësi që i ka pasur edhe Gattuso si futbollist”, deklaroi Carlo Ancelotti.
