Presidenti i Federatës Shqiptare të Futbollit ka uruar nisjen e kampionatit të 80-të futbollit shqiptare nëpërmjet një statusi në Facebook.
Por për presidentin tonë kemi një pyetje shumë të thjeshtë, këtë kampionatin jubilar madhështor ku mund ta shikojmë?
Kjo për vetë faktin e vetëm pasi televizionit publik shqiptar, nuk i është dhënë e drejta e transmetimit.
Zoti Duka ju lutem na thoni ku mund ta shikojmë?!!!!
Statusi i Dukës:
Sezon të mbarë dhe një garë sa më FAIR!
Të dashur futbollistë, e trajnerë e të gjithë ju që jeni pjesë e pandashme e garës!
Nisim sot një tjetër rrugë të gjatë dhe me shumë emocione, atë të një tjetër kampionati, mes dhjetë skuadrave të elitës në futbollin shqiptar, pjesë e Kategorisë Superiore.
Ky sezon përkon edhe me një jubile, atë të kampionatit të 80-të të futbollit shqiptar.
Të dhjetë ekipet janë tashmë në garë për të gjitha verdiktet e sezonit. 36 javë sfida e përballje, të cilat, natyrisht do të përcjellin emocionet e mëdha që sjell loja dhe ecuria e saj, javore dhe sezonale. Kam bindjen e palëkundur që, ashtu edhe si në çdo edicion, edhe këtë radhë sfida do të jetë shumë e fortë, shumë e bukur dhe me suprizat, apo risitë e saj.
Tashmë skuadrat kanë kryer edhe fazat e tyre përgatitore, teksa një pjesë e tyre vijnë edhe nga paraqitjet në kupat e Europës, për të qenë gati për start.
Me lejoni që të uroj të gjithë aktorët e garës një sezon të mbarë e të sukseshëm për gjithsecilin. Një kampionat sa më FAIR, sa më të bukur, dyluftues dhe shumë emocional.
Federata ka qenë dhe do të jetë përherë sensibël dhe tejet e angazhuar karshi mbarëvajtjes së garës. Problematikat janë të pashmangshme në një sezon, apo gjatë një kampionati, sidoqoftë, energjitë e orientuara vetëm drejt fushës dhe lojës kanë prodhuar përherë rezultatin e tyre.
Shumë sukses për të gjitha klubet në garë, pa harruar kurrsesi edhe tifozerinë tonë të mrekullueshme, e cila gjithmonë është një element më shumë në jehonën e rivalitetit të garës mes skuadrave.
