Një i ri shqiptar ka humbur jetën në Itali, pasi u plagos në një aksident të ndodhur disa ditë më parë. Siç raportojnë media lokale “7 giorni”, viktima është Mateo Huqi 19 vjeç, i cili humbi jetën këtë të martë në spitalin San Gerardo në Monza.
![Artikulli i medias italiane, në fotografi Mateo Huqi](http://www.panorama.com.al/wp-content/uploads/2018/08/MATEO-HUQI.jpg)
Artikulli i medias italiane “7 Giorni”, në fotografi Mateo Huqi
Aksidenti
Me ndarjen nga jeta të Mateos, numri i viktimave nga aksidenti tragjik shkon në dy. Më 9 Gusht u nda nga jeta italiani Marco Crini, 19 vjeç, shok i Mateos.
![Artikulli i medias italiane lamartesana.it, në foto Marco Crini](http://www.panorama.com.al/wp-content/uploads/2018/08/Marco.jpg)
Artikulli i medias italiane lamartesana.it, në foto Marco Crini
Raportohet se një tjetër i ri ndodhet në spital. Të tre ishin duke biseduar anë rrugës në autostradën në “Paullese” pasditen e 7 gushtit kur janë përplasur nga një kamion.
Përplasje që rezultoi fatale për 19-vjeçarin Marco Crini, i cili ndërroi jetë dy ditë më pas. Të njëjtin fatin kishte sot edhe Mateo, zëmra e të cilit pushoi së rrahuri rreth orës 16 të ditës së sotme, raportojnë mediat lokale. Pas përplasjes nga kamioni, shqiptari u transportua në spital, por nuk arriti të mbijetojë.
![Foto nga aksidenti tragjik](http://www.panorama.com.al/wp-content/uploads/2018/08/Aksindeti-itali.jpg)
Foto nga aksidenti tragjik
“Një tragjedi”
Sipas të njëjtave burime, Mateo ka punuar në “Sicurcond”, kompani ndërtimi në Settala për rreth 6 muaj.
Kushëriri i Mateos, Erlind Tafa është shtruar në spital në komunën milaneze San Donato Milanese dhe ndodhet jashtë rrezikut për jetën.
“Ne jemi të shkatërruar, shprehet pronari i kompanisë ku ishte i punësuar Mateo. Ne jemi pranë familjes. Një tragjedi”.