Nga Boldnews.al
Komisioni i Pavarur i Kualifimikit ka konfirmuar në detyrë prokurorin e Prokurorisë së Përgjithshme, Kosta Beluri, por duke vënë pikëpyetje mbi “neglizhencat e tij” në hetimin e një rasti korrupsioni, ku i dyshuar ishte anëtari i Gjykatës së Lartë, Admir Thanza, aktualisht i shkarkuar nga shkalla e parë e Vetingut.
Por, duke parë vendimin e zbardhur të Komisionit të Vetingut për prokurorin Beluri dhe gjyqtarin Thanza, në fakt konstatohet se edhe vetë KPK ka “neglizhuar” dhe nuk ka kryer hetime më të thelluara për këtë rast, duke shmangur në këtë mënyrë nga përgjegjësia e drejtëpërdrejtë ish-drejtuesen e Njësisë Antikorrupsion në Prokurorinë e Shkodrës, sot Prokurore e Përgjithshme e Përkohshme, Arta Marku.
Në Prill të vitit 2016, prokurori Beluri ka regjistruar procedimin penal për korrupsion kundër Admir Thanzës, pasi, në bazë të një hetimi të nisur nga Prokuroria e Shkodrës rreth dy muaj më parë (Shkurt 2016) ishin krijuar dyshimet se gjyqtari ishte përfshirë në një rast mitmarrjeje, në këmbim të mos-arrestimit të një zyrtari lokal në qytetin verior.
Sipas ligjit të kohës, kur i dyshuari ishte anëtar i Gjykatës së Lartë, atëherë hetimi duhet të vijonte nga Prokuroria e Përgjithshme, institucion ku ushtronte funksionin edhe prokurori Kost Beluri. Ky i fundit, pasi shqyrtoi aktet e ardhura nga prokuroria e Shkodrës dhe kreu disa veprime proceduriale, vendosi pushimin e çështjes, për shkak se nuk mundi të siguronte elementët e korrupsionit.
Shumica e treshes së Komisionerëve, e përfaqësuar nga Lulzim Hamitaj dhe Brunilda Bekteshi, vunë në pikëpyetje aftësinë e prokurorit Beluri. Ata pretenduan se, pavarësisht se ekzistonin prova të forta për përfshirjen e gjyqtarit Thanza në korrupsion, prokurori gjithësesi vendosi pushimin e hetimit.
Sipas tyre, në dosje ekzistonin pamje filmike dhe përgjime, në të cilat krijoheshin dyshime të forta për implikimin e Thanzës në korrupsion.
Beluri, nga ana e tij, u mbrojt duke deklaruar se, kur dosja u transferua në Prokurorinë e Përgjithshme, dy muaj pasi kishte nisur hetimin Prokuroria e Shkodrës, kishin humbur të gjithë elementët e “befasisë”. Ai shpjegoi se korrupsioni, në përgjithësi, zbulohet në flagrancë, në momentin e shkëmbimit të parave.
Sipas Belurit, nëse do të kishte pasur një situatë të tillë “shkëmbimi parash”, siç pretendohet në kohën kur hetimi zhvillohej nga Prokuroria e Shkodrës, atëherë duhej ndërhyrë menjëherë që në atë moment nga forcat operacionale të Policisë së Shtetit, me urdhër të Prokurorisë lokale. Kjo ndërhyrje, siç rezulton, nuk është kryer dhe, në këtë mënyrë-argumentoi Beluri-edhe nëse do të kishte pasur rast korrupsioni, ai tashmë ishte realizuar, pa u kryer arrestimet.
Në mënyrën se si e trajtoi rastin prokurori Beluri, dhe këtë ai e mbështeti në provat e dosjes, atëherë përgjegjësia për hetimin e dështuar ndaj Admir Thanzës rëndon mbi Prokurorinë e Shkodrës, e konkretisht Njësisë Antikorrupsion, e cila në atë kohë drejtohej nga Arta Marku.
Kjo e fundit e ka pranuar publikisht dhe zyrtarisht se ajo ka qenë përgjegjëse për hetimet më të rëndësishme anti-korrupsion në Prokurorinë e Shkodrës dhe i ka ndjekur në dinamikë veprimet e prokurorëve.
Në seancën dëgjimore në Parlamentin e Shqipërisë, ku u paraqit si kandidaturë për Prokuror të Përgjithshëm të Përkohshëm, pyetjes se “cilat kanë qenë rastet më të suksesshme që ke ndjekur si prokurore”, Arta Marku iu përgjigj: “Rastet e drejtëpërdrejtë mund t’i numëroj me gishtat e dorës. Unë kam qenë drejtuese e njësisë Task-Force Antikorrupsion dhe kam qenë në drejtimin e të gjithë hetimeve që kryheshin nga prokurorët që ishin pjesë e kësaj strukture”.
Rrjedhimisht, Arta Marku ka qenë nën drejtimin edhe të hetimit, ku rezultonte i dyshuar për korrupsion anëtari i Gjykatës së Lartë, Admir Thanza. Ky hetim, siç rezultoi edhe nga të dhënat e paraqitura në seancë dëgjimore të Komisionit të Vetingut për prokurorin Kosta Beluri, dështoi “me sukses”, për shkaqe, të cilat KPK nuk u thellua t’i zbulonte gjatë verifikimit të kryer për Prokuroren e Përgjithshme të Përkohshme, Arta Marku.
Komisioni i Pavarur i Kualifikimit u mjaftua me dërgimin e dosjes së prokurorit Kosta Beluri për inspektim, ndërkohë që rezulton se nuk mori asnjë masë verifikuese apo vijuese për rolin e Arta Markut në dështimin e kësaj dosjeje korrupsioni të një anëtari të Gjykatës së Lartë, ndër të rrallat e Prokurorisë Shqiptare në dy dekadat e fundit.
