Neymar do të luajë për Real Madrid një ditë. Në mos sot, nesër. Kështu mendon të paktën legjenda e Brazilit, Rivaldo. Ish-lojtari i Barcelonës ka dhënë një intervistë për spanjollen “Marca” ku është shprehur i sigurt që sulmuesi i PSG do të rikthehet në kampionatin spanjoll, pikërisht te Real Madrid.
“Për momentin më duhet t’i besoj fjalës së tij që do të qendrojë te Paris SG. Por nga ajo që di, nga fjalët që kam dëgjuar, mendoj që herët a vonë do të përfundojë në Madrid”, thotë Rivaldo. Me “herët a vonë” kampioni i botës i vitit 2002 nuk e ka fjalën për këtë verë, edhe pse gjithçka mund të ndryshojë deri në mes të gushtit. Por, në një të ardhme të afërt. “Me shumë mundësi Neymar do të qendrojë në Francë edhe për një tjetër sezon. Por me një merkato kaq të çmendur, ku nuk dihet çdo të ndodhë të nesërmen, gjithçka është e mundshme, deri sa të përfundojnë afatet”.
Rivaldo ka qenë protagonist i një transferimi të bujshëm në Spanjë, më saktë te Deportivo në vitin 1996, skuadër që pagoi 6 milionë Euro te Palmeiras. Një sezon më pas, Barcelona katërfishin e kësaj vlere, duke aktivizuar klauzolën e largimit në kontratën et ij. Shifra të çmendura për kohë, që vazhdojnë të bëhen edhe më të çmendura me kalimin e viteve.
Vetë Neymar është frymëzuar shumë te Rivaldo e ndoshta kjo ka qenë edhe arsyeja pse fillimisht ka zgjedhur Barcelonën. Por tashmë, sipas vetë Rivaldos, ai do të mbajë fanellën me numër 10 në “Bernabeu”, të cilën Florentino Perez me siguri do ta ruajë, duke qenë se Luka Modric duket tashmë i larguar.
