Këshilltari i presidentit Trump për Sigurinë Kombëtare mohon ndonjë përfshirje të qeverisë amerikane në shpërthimet me dronë të shtunën në kryeqytetin e Venezuelës gjatë një fjalimi të presidentit Nicolas Maduro.
John Bolton tha për televizionin Fox News se derisa Maduro të japë prova të forta për akuzat e tij, fokusi duhet të jetë tek korrupsioni dhe shtypja e regjimit të tij. Presidenti i Venezuelës ka premtuar “dënimin maksimal” për atë që ai e quan një përpjekje për vrasjen e tij.
Zyrtarët në Venezuelë thonë se dronët me eksplozivë shpërthyen kur Maduro po u drejtohej trupave në një fjalim televiziv të shtunën. Qeveria Maduro e ka quajtur sulmin një përpjekje për vrasjen e presidentit.
“Kjo ngjarje që ndodhi të shtunën ka arritur një ekstrem shumë të rrezikshëm. Ata kanë bërë një përpjekje për vrasjen e Presidentit Nikolas Maduro”, tha Vladimir Padrino, ministër i Mbrojtjes.
Maduro ka fajësuar për sulmin ata që ai i quan grupe të ekstremit të djathtë në Venezuelë, mbështetur nga presidenti kolumbian Juan Manuel Santos dhe nga financierë në Florida. Ministria e jashtme e Kolumbisë reagoi menjëherë me një deklaratë ku thuhet se akuzat ishin absurde. Këshilltari i Sigurisë Kombëtare Xhon Bolton i bëri thirrje qeverisë së Maduros të japë prova për pretendimet e saj.
“Nëse qeveria e Venezuelës ka informacion të besueshëm, që do të tregonte një shkelje të mundshme të ligjit penal amerikan, atëherë do ta shqyrtojmë seriozisht këtë. Por, ndërkohë, mendoj se ajo tek e cila duhet të përqëndrohet është korrupsioni dhe shtypja e regjimit të Maduros në Venezuelë “.
Udhëheqësi autoritar i Venezuelës mori pushtetin në vitin 2013 pas vdekjes së paraardhësit dhe mentorit të tij Hugo Chavez. Maduro u rizgjodh në maj të këtij viti në zgjedhjet e parakohshme që kritikët thanë se nuk i dhanë kohë opozitës të përgatitej. Nën udhëheqjen e Maduros, ekonomia e Venezuelës është shkatërruar dhe qeveria e tij është akuzuar për korrupsion. Kritikët e tij janë burgosur ose janë internuar.
Vetëm dy ditë përpara incidentit të së shtunës, ish-kryeprokurorja e Venezuelës Luisa Ortega paraqiti akuza kundër Maduros në një gjyq simbolik në Kolumbi.
“Ministria e Punëve Publike e Venezuelës ka akuzuar Nicolas Maduron për korrupsion dhe përvetësim të paligjshëm të kapitalit dhe sot filloi procesi gjyqësor.”
Zoti Bolton tha se është e vështirë të thuhet se kush nga opozita e gjerë e Maduros mund të ketë ndërmarrë sulmin, të cilin ai tha gjithashtu se mund të jetë “një pretekst i krijuar nga vetë regjimi”.
