Serbia ka hyrë zyrtarisht në heshtje zgjedhore që prej ditës së sotme, një gjëndje e cila pritet të zgjasë deri në orën 20.00 të ditës së dielë. Qytetarët do t’u drejtohen qëndrave të votimit më datë 24 prill për të ushtruar të drejtën e tyre demokratike. Zgjedhjet e parakohshme u thirrën nga Kryeministri i Vendit, Aleksander Vuçiç. Dikur një ultranacionalist, Vuçiç ka ndryshuar pikëpamjet e tij që prej vitit 2008. Ai do të kërkojë që të fitojë një shumicë të cilësuar në këto zgjedhje, për të miratuar disa reforma që do t’i japin një shtysë vendit drejt anëtarsimit në Bashkimin Europian. Sondazhet kanë treguar se Partia Progresive Serbe është favoritja kryesore për të dalë e fituar, por pritet të shihet nëse Aleksandër Vuçiç do të përmbushë me sukses qëllimin e tij.
Një rezultat pozitiv pritet të marrë edhe Partia Socialiste e Serbisë, që kryesohet nga zv. Presidenti Ivica Daçiç. Pavarësisht të qënurit në një koalicion, Vuçiç është shprehur edhe publikisht se nuk bie dakord për shumë pika në lidhje me aleatët e tij në qeverisje.Por ekspertët kanë gjykuar se rreziku kryesor që mund t’i kanoset pikëpamjeve të Vuçiç është ish-mentori i tij, Vojslav Sheshel.
Ultranacionalisti u shpall i pafajshëm nga gjykata e Hagës dhe do të garojë në zgjedhje me Partinë Radikale Serbe, e cila drejtohet prej tij. Premtimet e bëra prej tij kanë ndezur disa grupe të ekstremit të djathta, ndaj nuk do të ishte habi që kjo forcë politike të jetë e pranishme edhe në sallën e parlamentit.
Në votimet e ditës së dielë do të votojnë edhe serbët e Kosovës. Zyrtarët kanë komunikuar se në territorin kosovar do të ketë gjithësej 90 qëndra votimi që do të shpërndahen në 21 zona të ndryshme. I pyetur nga mediat, Kryeministri i Kosovës, Isa Mustafa, ka deklaruar se një gjë e tillë nuk përbën një cënim të sovranitetit pasi mbledhja e votave do të kryet nga misioni i OSBE-së.
