Ashtu siç është bërë e ditur edhe më herët, Presidenti amerikan Barack Obama i ka bërë thirrje Britanisë së Madhe të qëndrojë brenda BE-së, me të zbritur në tokën britanike në atë që është edhe udhëtimi i tij i fundit si president i Amerikës. Vizita, siç ishte programuar, nisi me një drekë mes kreut të Shtëpisë së Bardhë dhe Mbretëreshës Elizabeth të Anglisë.
Obama do të qëndrojë për tri ditë në ishullin britanik së bashku me bashkëshorten e tij, Zonjën e Parë të Amerikës, Michelle Obama, teksa është takuar edhe me kryeministrin David Cameron për bisedime. Më herët gjatë ditës së sotme, Obama kishte thënë për “Daily Telegraph” se, duke qëndruar në BE, Britania mund ta shfaqë në mënyrën më të mirë të mundshme influencën e saj anembanë botës.
Megjithatë, kryebashkiaku i Londrës, Boris Johnson e quajti pikëpamjen e tij “hipokrite”, duke e përshkruar sistemin e BE-së si “të huaj” kundrejt traditave amerikane. Kryeministri britanik Cameron e ka pritur Obamën në “Downing Street”.
Dy krerët më të lartë të vendeve respektive kanë biseduar mbi luftën kundër të ashtuquajturit Shtet Islamik, ndërkohë që më vonë takimit do t’i bashkëngjiten edhe ministri britanik i Brendshëm, ai i Jashtëm dhe ai i Mbrojtjes. Nuk do të mungojë gjithashtu edhe Sekretari i Thesarit (apo ai i Ekonomisë).
Cameron dhe Obama besohet të kenë biseduar mbi progresin e bërë në luftën kundër ISIS në Irak dhe se, çfarë mund të bëhet më shumë për të frenuar deri në zhdukje grupin xhihadist në Siri. Situata në Libi, ku Perëndimi po konsideron mënyrat sesi të mbështesë Qeverinë e sapoformuar të Akordit apo Unitetit Kombëtar në betejën kundër ISIS, pritet të diskutohet gjithashtu. Obama dhe Cameron do të mbajnë një konferencë për shtyp pasditen e sotme.
Fillimisht, presidenti dhe Zonja e Parë, Michelle Obama morën pjesë në një drekë private me Mbretëreshën Elizabeth dhe Dukën e Edinburgut në kështjellën “Windsor”, vetëm një ditë pas festimeve të 90-vjetorit të lindjes së Mbretëreshës.
Çifti Obama i dhuroi Mbretëreshës një album fotografik të vizitave të shumta të saj me presidentët amerikanë dhe zonjat e tyre. Albumi nis me foto që nga vizita e saj në Amerikë në vitin 1951, atëherë kur quhej Princesha Elizabeth duke mbajtur postin e Dukeshës së Edinburgut, e që kishte vizituar “Mount Vernon Estate” të George Washingtonit, si dhe u takua me Presidentin Harry Truman në Shtëpinë e Bardhë.
Duka dhe Dukesha e Kembrixhit dhe Princi Harry do të mirëpresin çiftin Obama për darkë në “Kensington Palace” mbrëmjen e sotme.
