Një tjetër denoncim, vjen nga partia demokratike. Këtë radhë është deputeti i Partisë Demokratike, Xhemal Gjunkshi i cili ka denoncuar rastin e një investimi të lënë në mes në qytetin e Peshkopisë.
Në rrjetin e tij social, ai ka publikuar disa foto, ku shikohen punimet të cilat sipas tij janë ndërprerë, duke u krijuar edhe më shumë vështirësi banorëve të këtij qyteti.
Postimi i plotë:
“Kjo është unaza e lënë përgjysmë prej më shumë se 4 vitesh. Këto pamje që qytetarët e Peshkopisë shohin çdo ditë me sytë e tyre, dëshmojnë qartë se çfarë ndodh kur fondet e rrugës shkojnë për të blerë votat.
Këto pamje dëshmojnë se Bashkia e Dibrës është e paaftë t’i kërkojë firmës mbylljen e punimeve që kane nisur që me ardhjen e tyre në pushtet. Kjo Bashki është e paaftë të shpronësojë qoftë edhe një magazinë që të lirojë unazën. Kjo është Rilindja që ka kapur në fyt e po i merr frymën çdo ditë Dibrës”.
